Indian Super Cup final Bengaluru hmaah East Bengal
Indian Super League leh I League club-te inelna Super Cup final chu vawiin tlai dar 4:00 hian khelh a ni dawn a, Bengaluru FC leh East Bengal an inhmachhawn dawn.
Bengaluru-in ISL-a an season hmasa berah nomawi beisei mah se final-ah Chennaiyin FC ngam loin an tlawm a, East Bengal-in champion duha Khalid Jamil an lalut chungin nomawi an chawi thei lo bawk.
Nomawi chawi duha tuihal ve ve team pahnih vawiin tlaiah an intawng dawn a, inkhel hmuhnawm a beisei ngam ang.
East Bengal-ah hian Lalramchullova, Brandon VL Remdika leh Laldanmawia Ralte te an awm a, Blues-a awm Mizo player-te erawhin hmun pawimawh an chang phak meuh lo.
Miku & Chhetri
Bengaluru FC-in season duhawm tak an hman chhanah Miku leh Sunil Chhetri hming lam hmaih a thiang lo.
Venezuela international Miku-a'n Indian football-a a season hmasa berah match 24 khelin goal 19 a khung tawh a, Chhetri-a'n tun season-ah match 23 khelin goal 18 a khung tawh thung.
Hetihlai hian East Bengal technical director Subhash Bhowmick chuan an dan theih a
beisei. Bhowmick chuan, "FC Goa striker Ferran Corominas kha Miku aia ka dah san a ni a, ani kan dan theih chuan Miku kan dang thei ang," a ti.
Amna & Katsumi
Bengaluru-in Miku leh Chhetri an chhuang a nih chuanin East Bengal hi chhuan tur nei lo an ni bik lo. Kolkata club tan Mahmoud Al Amna leh Katsumi Yusa inkawp chu hmuhnawm khawp an ni a, Blues tlarhnung buaina thlen turin an ṭha tawk.
Syria tana vawi 78 inlan thei Al Amna-a'n a ball thiamna leh finna a larpui laiin Katsumi erawh a tlan chakna leh taimak vanga hriat hlawh a ni thung a, player pahnih inkawp hlauhawm zia hrechiangtu chu ISL club FC Goa an ni.
Al Amna chuan, "Katsumi hi tawnhriat ngah tak player a ni a, kan pahnih inkawp hi team tan a ṭangkai a ni," a ti.
Danmawia vs Udanta
East Bengal leh Bengaluru an inhmachhawn dawn tih a chian ruala player khaikhin hlawh ber chu Laldanmawia Ralte leh Udanta Singh te an ni.
Player pahnih hi mual sira chhawr ve ve an ni a, an tlan chak bawk avangin khaikhin an hlawh hi a awm lo hran lo. Udanta hi a tlan chakna leh tharum ngah piah lamah Miku leh Chhetri tana 'cross' hlauhawm tak a neih ṭhin chu a hmingthanpui a ni - ISL ah khan assist vawi sarih a nei.
Danmawia'n last 16-a Mumbai City 2-1 a an hneh ṭumin assist vawi hnih a nei a, Aizawl FC lakah chakna goal penalty hmangin a khung bawk - Sialhawk Express hian Manipur winger lar a hnuaichhiah thei ang em? Vawiinah a chhanna pek kan ni dawn e.