India junior captain Siami

Mizo tleirawl duhawm Lalremsiami chu India junior hockey team captaina ni dawn. India hian April 25-29 chhung hian Bangkok-ah Youth Olympic Games qualifier an khel dawn a ni, inelna hi kum 15-18 inkarte tana buatsaih a ni.

Asian Cup 2017 champion zinga tel tawh forward Siami hi a kum la naupang deuh mah se, a theihna a san em avangin senior team-ah pawh koh a ni tawh. Commonwealth Games 2018-ah pawh khan senior team tan khelin, Australia aṭanga an rawn haw hnuah junior camp a zawm lehnghal.

2018 Summer Youth Olympic hi October 6-18 chhungin Buenos Aires, Argentina-ah neih tur a ni dawn a, hmeichhe hockey-ah hian Africa, Asia, Europe, Oceania leh Pan America aṭangin team 10 an inel ang. Kolasib tleirawl Siami telna India hian Asian qualifier a paltlang

phawt a ngai dawn a, a vawi khat nan Youth Olympic-ah inlan an tum dawn a ni.

Asian Youth Olympic Games Qualifier bikah hian ram pakua an inel dawn a, India hi Pool B-ah South Korea, Thailand leh Singapore te nen an awmkhawm. An inkhelh kual vek hnuah a sang pahnih te chu Youth Olympic khel turin an tling dawn.

Hockey India (HI) chuan a tirah chuan inelna hmachhawn tur hian player 40 a ko a, March thlatir aṭang khan training nei tawhin, Siami bakah hian Hnahthial tleirawl Lalrindiki chu koh leh mai theih (standby) zingah dah a ni bawk.