Nadal leh Djokovic hna a awlsam
World number 1 Rafel Nadal tan Monte Carlo Masters third round lut turin harsatna a awm lo. Nilaini zan khan Nadal bakah Novak Djokovic chuan a match hnihna khelin harsa lo takin hnehna a chang ve bawk.
Monaco-a inkhelah champion lai Nadal hian world number 58 Aljaz Bedene chu 6-1, 6-3 in a hneh a, a match hmasa bera hnehna chang tur hian darkar khat leh minute 17 bak a mamawh lo. A inkhelh thiamna clay court-ah a mikhual lo nghal hle.
Davis Cup chhiar tel lohin Spain tlangval Nadal tan Australian Open hnua a match hmasa ber a ni a, a service hmasa aṭangin 75% zet point hmu theiin, break point vawi riat a hmuh zinga vawi li a chhawr ṭangkai thei. A tir aṭanga a tawp thlengin inkhel a thunun tluan chhuak zak.
Monte Carlo Masters vawi 10 champion tawh Nadal hian ranking-a a dinhmun ngai chelh turin champion a mamawh dawn, nomawi a chawi lo a nih chuan Roger Federer-a'n a rawn khum thei ang. Grand Slam vawi 16 champion tawh Nadal hian nizan khan world number 38 Karen Khachanov a hmachhawn leh nghal a, he thu buatsaih lai hian result kan hre hman lo.
Inkhel dangah world number 1 hlui Novak Djokovic chuan Borna Coric chu 7-6 (7-2), 7-5 in a hneh ve bawk. Serbian tlangval hian set hnihna an khelh laiin match point a hmuh hmasak vawi kua ngawt a chhawr ṭangkai thei lo a, world number 39 laka hnehna chang tur hian match point vawi 10-na a nghah thlen a ngai a ni.
Grand Slam vawi 12 champion tawh Djokovic hian seeded pangana Dominic Thiem a hmachhawn leh dawn a, a chak zawk hian quarterfinal-ah Nadal an hmachhawn theih dawn avangin an kawng a awlsam dawn lo hle.
Coach thar Marian Vajda kaihhruaina hnuaia khel Djokovic chuan, "Kum hnih hnuah na nei loin ka khel thei ve ta. Hun rei tak chhungin tournament tam tak ka khel thei lo a, tunah chuan nuam ti takin ka khel ve thei leh ta," tiin a kiu hliam an zai hnuah a dam tawh thu a sawi.
Inkhel dangah hliam dam hlim ve tho Kei Nishikori chuan Russian tlangval Daniil Medvedev chu 7-5, 6-2 in a hneh. Jananese star hian a match lehpekah chuan British number one Kyle Edmund hnehtu Andreas Seppi a hmachhawn leh dawn a ni.