Real chhandam nan Ronaldo bawk!
Spanish champion Real Madrid-in chhandamtu tura an mamawh chu a ngai reng a la ni–Nilaini zan khan Athletic Bilbao lakah 1-0 a an tlawm reng hnuin Cristiano Ronaldo chuan si phurh sutna goal a khung hram a, mualpho tura ngaih an nih hnuah 1-1 in an khingpui an inhnehtawkpui.
Real-in an khingpui an inhnehtawkpui zanah Valencia-in eng ruai an ang bik lo a, hnehna chang ni se pathumna Real nen point in ang tur an nih laiin Getafe lakah 1-2 in an tlawm.
La Liga table-a palina ni mek Valencia hian pangana Real Betis aiin match khata khel tamin point 13-in an sang zawk a, nizana Betis result a zirin an inthlauhna hi la danglam thei mah se Champions League erawh an khel ngei dawn niin a lang tawh–Real lehpela pathumna an nih erawh chuan playoff an pumpelh thung ang.
Player siksawi
Santiago Bernabeu-a inkhelah Zinedine Zidane-a'n a player ṭha inkhel bul a ṭantir a, tun hnaia che ṭha zawn tak Isco leh Gareth Bale erawh bench-ah dah an ni. Real hian Nilaini zanah Bayern
Munich chu Champions League semifinal second leg khelhpui turin an lenchilh dawn.
Zidane-a'n German champion nena an inkhel tur hi Juventus an hneh hnua an match hmasa ber aṭangin a thlir lawk tawh a, Malaga an tum ṭumin Ronaldo, Bale leh Luka Modric chu squad-ah pawh hmuh tur an awm lo a, Toni Kroos chu bench-ah dah a ni bawk.
French manager hian Bilbao lakah Malaga laka hahdam tawh Modric, Kroos leh Ronaldo te inkhel bul a ṭantir vek a, tun hnaia khel ṭha tluang tak Isco erawh minute 69-naah Bale nen bench aṭanga tlan luhtir chauh an ni thung.
Inaki a 'cial
Real-in Bale leh Isco chhawr lo mah se Modric, Kroos leh Ronaldo ten inkhel bul an ṭan avangin Bilbao lakah talbuai tura ngaih an ni lo a, mah se Santiago Bernabeu-ah goal an chhuah hmasa tlat si.
Minute 14-na lekah Europe club liante chil ti puttu Inaki Williams chuan tawih zetin mikhual team tan goal hmahruai a khung a, Real an hawihai hle–kum 23 mi forward hi Arsenal, Liverpool leh Manchester City te nen sawizawm a lo ni tawh a, Real laka a goal hian club dangte chil a tih put chhan a pholang.
Mahse, Inaki hi amah duhtu club chuan pound maktaduai 69 bawr vel insen an huam a ngai dawn–January khan Bilbao-ah hian kum 2025 thleng cham chhunzawm turin contract thar a ziak a, club dangin an duh chuan pound maktaduai 69-in an lei thei ang tih a tel. Tunlai player man leh a thiamna ngaihtuahin manto erawh niin a lang lo.
Ronaldo bawk chu...
Santiago Bernabeu-ah Real-in rei tak chhung si an phur a, beisei angin goal an khung lawk lo. Mahse, Real hi an mualah an tlawm mai dawn nia a lan tawh hnuah an thiampuipa Ronaldo a inlar a, hun tawp nan minute thum chauh a awm tawh tihin si phurh sutna goal a khung.
Ronaldo goal hi Luka Modric ke aṭanga chhuak a ni a, Croatian midfielder hnen aṭanga a ball hmuh chu a kheng lut. Portuguese forward tan tun season-a a goal 42-na a ni leh der tawh a, heti zat goal khung tur hian match 39 bak a mamawh lo.
Season ṭantira chuai tawh anga an sawi Ronaldo hian a match hnuhnung 16 aṭangin goal 26 ngawt a khung a, a la chuai lo tih khelmualah a pholang zel. Real-in an si phurh sut tur hian hun duh rei mah se inkhel erawh thunun lo an ni lo–Ronaldo hian goal a khung hmain crossbar a tauh per a, Real nena sawizawm lo ni tawh Bilbao keeper Kepa Arrizabalaga chuan vawi 10 ngawt save a nei bawk!
Zidane a insawifiah leh ta!
Karim Benzema-a'n goal khung a harsat chungin Zidane-a hnuaiah hmun pawimawh a chang reng a, khel ṭha chungin Gareth Bale a inlan tam lo thung. French manager thutlukna hian mak tih a hlawh ṭhin a, Bilbao an hneh zawhah pawh Zidane-a'n zawhna a dawn tamna pahnih chu player pahnih chungchangah a ni.
Zidane chuan, "Bale nen hian buaina kan nei lo. Squad-a awm player 25 zingah a tel a, zaninah inkhel bul a ṭan lo a ni mai. Bale-a chungchang hi chu min zawt fo dawn a, mahse ka chhanna erawh a ngai reng a ni tho ang," a ti.
French manager chuan a hnampui Benzema chungchang sawi nghalin, "A chanchin engmah sawi tur ka nei lo. Theihtawp a chhuah reng a, a tawp thlengin a bei zel ang. Tuna kan tih tur chu media hoina in thil sawi ngaihven loh hi a ni a, a eng lam zel kan thlir a ni," tiin a sawi.