Kolkata Knight Riders an chak leh ta

Indian Premier League 2018-ah Kokata Knight Riders chuan an match hnuhnung bera Delhi Daredevils an hneh hnuin a zawna match hnih an chakna ni turin Nilaini zan khan Rajasthan Royals an hneh a, wicket sarihin hnehna an chang.

Jaipur khawpuia inkhelah mualneitu Rajasthan an bat hmasa zawk a, Opener Ajinkya Rahane (36 runs) leh D'Arcy Short (44) ten bul rawn ṭan ṭha viau mah se an ṭhian dangte zingah puitu an nei ṭha tawk lo–RR tan batsman dang zingah run 30 vaw kai an awm lo.

Mahni mualah Rajasthan club-in over 20 chhungin run 160 chiah an siam a, wicket riat an hloh. KKR tan um huphurhawm a ni lo a, RR beiseina a tlem.

Kolkata club tan Sunil Narine-a'n run 35 rawn siam nghal mah se a dinpui Chris Lynn erawh run pawh siam loin a out a, Rajasthan-in beiseina an nei hman.

Mahse, mualneitu team beiseina zawng zawng chu Robin Uthappa (48 runs), Nitish Rana (35, not out), Dinesh Karthik (42, not out) ten rawn vuak bo sakin KKR-in over 18.5-ah run 163 an siam a, wicket thum chiah hlohin hnehna an chang chiang hle.