German Consul General leh MFA hruaitute inkawm

April 18 khan Mizoram Foot­ball Association hruaitute leh Dr Michael Feiner, Consul General, Federal Republic of Germany, Kolkata chuan Hotel Floria, Aizawl­ah inkawmna an nei a; Dr Feiner hian nimin khan Lammuala MFA Grassroots centre a tlawh bawk.

Nilainia an inkawmnaah hian MFA aiawhin president Lal Thanzara leh honorary secretary Lalnghinglova Hmar-te'n Dr Feiner hi an lo dawngsawng a ni.

MFA President chuan Mizoram leh Germany-in football lama thawhhona rei tak chhung an lo neih tawh dan a hrilh a, Kolkata-a Consulate General of Germany office kaltlanga thawho zui theih dan turte a zawt nghal bawk.

Dr Feiner chuan Mizoram Foot­ball Association leh Germany lamin football-a inkungkaihna a neih chu a hriat thu leh, Mizorama a lo kalin a mi kawm hmasak ber chu MFA an nih thu a sawi a, football lama Mizoram puih theih dan tur a ngaihtuah tur thu a sawi bawk a ni.

MFA Honorary Secretary chuan kum 2012-a German Consul General lo zin nen an inkawm hnua ani ruahmansak anga German coach pahnihin Mizorama coach-te training an pek thu te, kum 2014-a Bundesliga club Hoffenheim an lo zin thute leh German Student's National Team-in kum 2016-a Mizoram an tlawh thute a sawi a, Germany aṭanga football team eng emaw ber an lo kal leh theihna tura ruahmanna siampui turin a sawm bawk.

German Consul General chuan, MFA hruaitute sawipui angin hmeichhe football lamah pawh tih theih a neih chuan thuneitute sawipui a tum thu MFA hruaitute a hrilh.

Grassroots a tlawh
Dr Feiner hian nimin tlai khan Lammuala MFA Grassroots trai­ning kalpui chu a tlawh a ni.

Dr Michael chuan naupangten inkhelh an ṭan hmaa thu sawiin, "Germany atanga lo kal ka ni a, Germany leh Mizoram hian kawng tam takah football-ah inzawmna kan nei tawh. Thawhho zel theih ni se a lawmawm dawn a, kei pawhin kan inzawmna hi a chah lohna turin theihtawp ka chhuah ang," a ti.

German Consul General chuan naupangte chu football an khelh piah lamah an zirna ngai pawimawh turin a chah a: MFA-in naupangte tana football zirna ṭha taka an kalpui thei chu lawmawm a tih thu a sawi.