PFA team of the year City player panga an tel
Professional Footballers' Association Players' team of the year puan a ni a, 4-3-3 formation-a rem niin Premier League champion Manchester City-in player panga ngawt an thawh!
City player panga te hi champion nana thawhhlawk tak tak midfielder pahnih Kevin de Bruyne leh David Silva, defender Nicolas Otamendi leh Kyle Walker bakah striker Sergio Aguero te an ni.
Liverpool tana goal 30 khungtu Mohamed Salah chu team of the year-ah hian a lang a, Manchester United (David de Gea) leh Chelsea (Marcos Alonso) chuan pakhat ve ve an thawh ve bawk.
Arsenal-in player an thawh miah loh laiin an hmelma kumhlun Tottenham Hotspur chuan player pathum (Harry Kane, Christian Eriksen leh Jan Vertonghen ) an thawh thung.
David de Gea (Manchester United)
Spanish goalkeeper hi PFA team of the year-ah kum nga chhungin vawi li a lang thei a, shot a hmachhawn 80% chu save-in Europe-a top five leagues (England, France, Italy, Germany leh Spain)-a goalkeeper zingah save percentage nei ṭha pathumna a ni.
Kyle Walker (Manchester City)
Spurs aṭanga City pantu right back hian vawi 64 clearance neiin pass 2,225 a nei a, assist vawi ruk nei tawhin Premier League season khata assist a ngah ber ṭum a ni.
Nicolas Otamendi (Manchester City)
Premier League player zingah Argentine defender hian pass dik ngah berin vawi 2665 ball a thawn chhuak dik a, amah hnaih bertu aiin vawi 300-in a pass dik hnem zawk.
Jan Vertonghen (Tottenham)
Spurs-in tun season-ah match 14 chu goal chhuah loh an nei a, heng zinga match 13-ah hian Vertonghen a inlan. Belgium international hi boruak sangah a ṭhain boruak sanga ball inchuhah vawi 108 a hlawhtling a, vawi 220 ngawt khingpuite ball ken lai a chhuhsak.
Marcos Alonso (Chelsea)
Spanish defender hi Premier League defender zinga tun season-a goal khung hnem ber niin goal ruk a khung tawh a, defender zingah ani aia goal khung hnem an awm lo.
David Silva (Manchester City)
Silva hian City tan league-ah goal riat khungin assist vawi 11 a nei a, a pass zinga 89% chu pass dikin attacking player zinga pass percentage nei ṭha ber a ni.
Kevin De Bruyne (Manchester City)
De Bruyne-a'n tun season Premier League-ah assist 15 a nei a, Premier League chanchina season hnih chhung a zawna assist 15+ nei thei hmasa ber a ni. Chance vawi 102 siam tawhin ani aia chance siam hnem an la awm rih lo a, goal 11 a khung tawh bawk.
Christian Eriksen (Tottenham)
Denmark international hian Harry Kane-a tan goal khungna hun ṭha vawi 35 a siam sak a, tun season-ah player pahnih inkara 'inpuihna' tam ber a ni. Eriksen hian assist vawi kua neiin goal 10 a khung bawk.
Harry Kane (Tottenham)
Kane-a'n goal 26 a khung tawh a, Alan Shearer leh Thierry Henry tih loha season thum chhung emaw a aia tam season tina goal 25 aia tam khung ziah thei awmchhun a ni a, player of the year leh young player of the year-a thlan theih zingah a zawna a season li nan a lang mek.
Mohamed Salah (Liverpool)
Cristiano Ronaldo-a'n 2007-08-a goal 42 a khung hnuah Salah hi Premier League player zinga season khata inelna hrang hranga goal 40 khung tling leh thei hmasa ber a ni. Reds-in league-a goal an khung 75 zinga 30 chu a pet luh a ni a, chu chu 51% a ni. Merseyside club hian a goal khung (chakna goal & draw goal) vangin point an hmu dawn lo nia ngaih hnuah point 15 an hlawh chhuak a, Premier League player zingah heti zat team tana hlawh chhuak thei dang an awm lo.
Sergio Aguero (Manchester City)
Premier League-a season sarih hun a hman tawhah Aguero-a'n season hnih chiah goal 20 khung tlin loh a nei a, hetichung hian tun season hi Premier League team of the year-a a lan vawi khatna a ni! Argentine striker hian tun season-ah Premier League-ah goal 21 a khung tawh.