Arsenal 'Tak Tak' kan hmu leh ta

Football hmuhnawm chhawp chhuak ṭhin Arsenal chuan an ze pangngai an chhuah leh ṭan ta. Mikel Arteta naute hian an mikhual Tottenham Hotspur chu 3-1 in an sawp a, an chak danah Gunners ṭantute an lungawi tih a lang.

Emirates Stadium-ah Emile Smith Rowe, Pierre-Emerick Aubameyang leh Bukayo Saka ten goal an khung a, chawlhlawk hma hmain chak tur a chiang tawh - inkhel chawhnu lama Son Heung-min goal khungin Spurs mualphona a hliah khuh phak lo.

Arsenal ṭha ber
Nipui bazarah sum an hmang hnem a, mahse Premier League match hmasa pathum an khelhah an tlawm vek - a hniam ber dinhmun luah lai pawh an nei hial, technical director Edu-a'n an player leite khelh ho theih hun nghak hram turin fans a ngen hial a nih kha.

Hliam leh hri leng vanga an buaina a ziaawm tawh a, tunah chuan Arteta pawhin a duh ang takin a naute a remkhawm thei tawh. Tottenham laka team a thlan dan kha tun season bik atan chuan an ṭhat dan ber a ni tih a lang.

Hale End chhuak Smith Rowe leh Saka te mual sirah an intlan chhawk kual a, a laiah midfielder ball thiam Martin Odegaard an nei - a hmatawngah Auba awmin; anni ho thlawp leh veng tur hian Thomas Partey leh Granit Xhaka te an nei.

Gabriel leh Ben White an inkawp rem ta viau, wing-back Kieran Tierney bakah an lak hlima rin hlawh lo Takehiro Tomiyasu hi a man pek belh an in huam tawh hial mai thei, Aaron Ramsdale a chet ṭhat avangin Bernd Leno meuh pawh bench-ah a ṭhut a ṭul.

Laipui a puak
Minute 12-na lekah goal kan hmuh, midfielder Odegaard-a'n mual sira awm Saka hnenah ball pein, England international hian box chhunga a lakluh hnuah a hun taka rawn dawk chhuak Smith Rowe tan a pe a, keeper Hugo Lloris tan ven hman a ni tawh lo.

Counter attack kan hmu chhunzawm, mual sir lehlamah Smith Rowe-a'n chek zetin ball a tlan luh pui a, striker Abua tan duhthusama ṭhain a siamsak; an goal hnihna luh theih nan hian keeper hnen aṭanga ball latu Xhaka hna thawh a pawimawh hle.

Arsenal an phur tual tual, striker Harry Kane-a ball hloh vangin an vaw let a, Odegaard hnen aṭanga a ball hmuh chu Smith Rowe-a'n Saka tana lak nuam tawkin a pass zui, a tihsual khuh tumtu Kane-a'n ram tana a khelhpui hi dan tumin um zui mah se a dang zo lo, goal thumna a lut.

Gunners goal nawrna thahrui pathum - Saka, Smith Rowe leh Odegaard te hi kum 20, 21 leh 22 mi te an ni. Arteta-a'n team thar din a tumna kawnga mi pawimawh an ni chhunzawm dawn, duhthusam vek la ni lo mah se an rintlak chho ta hle.

Spurs an buai
Nuno Espirito Santo kaihhruaina hnuaiah Premier League match hmasa pathumah an chak a, table hmahruaitu an ni. Mahse, a zawnin vawi thum an chak lo leh ta, hmahruaitu ni ṭhin kha an hmelma Arsenal hnuaiah an awm leh der tawh.

Spurs manager Nuno-a'n mual sir aṭangin Arsenal-in a naute an nghaisa lai chu ngawi rengin a en, hun chanve hma lamah an tlarhnung a pherh takzet a, tlarhma lam an hriam tawk bawk si lo, hun rei lote chhungin hetiang taka an talbuai thei mai hi a mak zawk.

Dele Alli leh Japhet Tanganga te la chhuakin Oliver Skipp leh Emerson Royal te a dahlut, tlemin hma an sawn hret. South Korea international Son-a'n goal a khung theih phah a, Lucas Moura shot ṭha tak erawh Ramsdale ṭhatna lantirtu mai a ni.

Chhuak duh, mahse chhuak ta si lo Kane-a'n goal ban hrulah chiah a tauh chhuak a, keeper chauh a hmachhawn tawhah goal ban hrulah a pet chhuak bawk - a vannei tawk lo, a hmelah a phur lo tih a lang - pound maktaduai 150 zeta an dawr laia an hralh lo kha an la inchhir mai thei.

Mikel Arteta a hlim
Sawiselna leh diriamna karah pawh Mikel Arteta a nghing lo a, tunah zet chuan khawthlang media ṭhahnem tak chuan Arsene Wenger ang maia Arsenal manager ropui ni thei tura an rin thu an ziak par leh ta chei chuai mai.

Arteta chuan, "Emi-rates Stadium-ah hian player leh coach ka nih hnuah thil tam tak ka tawng tawh, tun ṭuma mi hi a nuam ber a ni hial awm e. Kan duh dan ang taka khel chungin hnehna kan chang, khelmual chhunga player leh fans an inpawh ṭha.

"Auba-a'n goal a khung a, goal dang pahnih khan Arsenal aṭanga inzir chhuakte khung a ni, anni pahnih khan kan khelh dan phung chu an hriain an thiam bel hle, an laka rinna ka nghat ngam hi ka tisual lo," a ti.
Gunners hian kar tawpah Brighton & Hove Albion an hmachhawn zui leh dawn, chumi hnuah international break a awm dawn - ram tana an feh chhuah hnuah October thla chhungin Aston Villa, Leeds United leh Leicester City te an tum leh ang.

Nuno a lawm lo
Nuno Espirito Santo-a'n an chak loh danah thutlukna a siam fuh loh thu a sawi a, chutih rualin player ṭhenkhat chuan an duh anga an khelh chhuah loh thu a sawi; an hming tarlang lo mah se Dele Alli leh Tanguy Ndombele te a sawi chhan niin a lang.

Spurs manager Nuno chuan, "Ruahmanna kan nei a, chumi ti hlawhtling tur chuan player thlan fuh a pawimawh. Player hming chu ka lamri lo ang, mahse khelmuala lut ṭhenkhat kha chu ka thlang fuh tawk lo.
"A nihna takah chuan midfield-ah khan Arsenal kha kan thunun thei zawk tura ngaih a ni, mahse nasa takin min chaih phar zawk ta si. Hlimna thu sawi tur a awm rih lo, thutlukna ka siam fuh tawk lo a ni," tiin a sawi.
North London club hian Europa Conference League an khel zui dawn, chumi hnuah Aston Villa an hmachhawn ang. Villa hi Old Trafford-a Cristiano Ronaldo telna Manchester United hnehtu an ni.