Santosh Trophy atan Mizoram an inbuatsaih

All India Football Association-in November thla tawpah Santosh Trophy khelh ṭan a nih tur thu an tichiang tawh a, Mizoram pawhin nimin zing aṭang khan Lammualah training an ṭan. Santosh Trophy atan hian player 50 vêl zet koh an ni a, District Football Association lamin an player ṭhate an tirh bakah Mizoram Premier League player aṭanga thlan an awm bawk.

Buaina a awm
AIFF-in Santosh Trophy bakah Indian Super League leh I League a kalpui dawn. State leh state inelna Santosh Trophy-ah hian ISL leh I League-a khel lai player an tel theih loh avangin player ṭha ṭhahnem tak thlan theih an ni lo.

Covid-19 vangin MPL8 final hnuah Mizoram chhungah mumal takin football khelh a ni tawh lo a, veng/khua inelna NECS Cup pawh kum 2020-ah khelh ni mah se hri leng vangin an khel zo thei lo. MPL8 final hi December 14, 2019 khan khelh a ni a, Aizawl FC-in Electric Veng FC 2-0 a hnehin an champion.

Player an ṭha
Hri leng vanga kum khat leh a chanve chhung local football mumal taka a kal thei lo chungin Mizoram team enkawltute an player thlan theih chinah an lungawi. Coach Samson Ramengmawia chuan, "Player kan nei ṭha dâwn hle. Kan senior player ṭhenkhat bakah kan la hmelhriat loh rawlthar ṭha tak takte District FA lamin an rawn tir a, a phurawm dâwn hle a ni," a ti.

Zo United coach hlui leh MFA-a technical officer ni lai Samson-a hi assistant coach HC Zarzoliana'n a ṭawiawm a, anni bakah MFA aṭangin team official R. Lalramzauva leh Lalenghluna (Maenga) ten team an enkawl a ni.

Santosh Trophy chu
Santosh Trophy hnuhnung ber kha Covid-19 vangin final round khelh theih a ni lo. Mizoram hian qualifying round-ah an khingpui Tripura, Arunachal Pradesh leh Assam te an hneh vek. Final round hi kum 2020-a khelh tur ni a, Mizoram thlen tur ni mah se hri leng vangin an ṭhulh.

Mizoram hi Santosh Trophy-ah vawi khat chiah an la champion a, kum 2014 khan coach H. Vanlalthlanga hoin Siliguri-ah nomawi an chawi. Hemi hnu hian ṭum nga Santosh Trophy hi khelh zawh a ni leh tawh. Mizoram hian vawi thum semifinal an lut a, ṭum khat group stage paltlang loin inelna hnuhnung berah final round an thleng zo lo.

Final an thlen zawh loh ṭum hian Meghalaya an hneh lo. Tun ṭumah hian North East qualifying round hi Meghalaya leh Manipur a khelh tura ruahman a ni dawn a, state dang hi an inpuahchah ṭan tawh bawk avangin qualifier paltlang ringawt pawh hi a awlsam dawn lo.