Porto khelmualah Liverpool; Milan mualah Atletico

Champions League khelh hun a thleng a, inkhel hmuh-nawm en turin min hmuak lehnghal - zanin dar 12:30-a group B inkhel turah Porto chuan Liverpool an mikhual dawn a, Atletico Madrid-in AC Milan an lenchilh dawn bawk.

Liverpool-in an match hmasa berah AC Milan an hneh avangin inrintawkna nen Porto an lenchilh dawn a, chutihrual chuan Portuguese club hian match hmasa berah goal khung loin Atletico Madrid an chelh thei tih hriat a ṭha.

Atletico hi Milan aia ṭha zawka ngaih ni mah se tun hnaiah result an nei ṭha lo a, Milan club-in point thum mitthla ran chungin Madrid khawpui an pan ngam ang tih a chiang.

Liverpool buaina
Reds-in Premier League-ah an hneh ngei tura ngaih Brentford an inhnehtawkpui a, tlarhnung a pawp tih a lang - Porto an hmachhawn zawhah league match khel turin Manchester City an mikhual zui dawn bawk a, a harsa dawn.

Tun season-ah Klopp-a'n player siksawi a uar thar a, City nena an inkhel tur thlir ran chungin Porto lakah pawh player a rem a rinawm. Chuti a nih chuan left back-ah Andy Robertson aiin Kostas Tsimikas chu lut tura ngaih a ni.

Tlarhnungah pawh Milan laka bench-a ṭhu Virgil van Dijk aiah Joe Gomez-a'n Joel Matip a rawn kawp a rinawm zawk a, tlarhmaah Diogo Jota leh Saido Mane hahdamtirin Mohamed Salah kawppui turin Takumi Minamino leh Roberto Firmino an luh a rinawm.

Porto an kim lo
Liverpool-in Thiago Alcan-tara leh Naby Keita an chhawr theih loh karah chanchin lawmawm hriat tur an nei a, Porto hian an ṭhat dan berin Reds an lo mikhual thei dawn lo - Atletico laka red card hmuh vangin centre back Chancel Mbemba Mangulu inlan theih a rinawm lo a, Atletico laka a inhliam hnuah tawnhriat nei ṭha Pepe a la inlan leh lo bawk.

Serbian midfielder Marko Grujic-a'n nipui transfer-ah season hmasaa loan-a a khelhna Porto chu Liverpool aṭangin a nghetin a zawm a, Jurgen Klopp-a'n thutlukna a siamsual tih pholan a duh dawn. Tlarhmaah Mehdi Taremi chu Reds tlarhnung tana ven bik tur a ni dawn a, Iranian forward hian tun season-ah match riat khelin goal li a khung leh der tawh.

Liverpool hian 2017-18 season khan Porto hi Champions League round of 16-ah khualmualah 5-0 in an sawp tawh a, Anfield-ah goal awm loin an inhnehtawk thung. An champion kum 2018-19 khan quarterfinal-ah 6-1 (agg.) in an lo hneh tawh bawk a, rilrua zuam tak chungin an pan ngei ang.

Atletico an buai?
Atletico Madrid-in Champions League-ah rin loh taka Porto an inhnehtawkpui hnuin ngai an awh leh tawh lo - an mikhual Athletic Bilbao chu goal khung loin an inhnehtawkpui zui a, Getafe lakah hun tawp dawna an goal hnih hmangin an chak hram a, an league match hnuhnung berah Alaves chu 1-0 in an ngam lo bawk!

Tun hnaia an 'form' en chuan team ṭha zawka ngaih ni mah se chak tura dah nghal ngawt bik an harsa a, hrem vangin Stefan Savic a inlan thei dawn lo bawk. Hetihlai hian hliam vanga league match hnuhnung pathuma inlan thei lo Thomas Lemar-a'n ngai a awh leh ṭan tak avangin an ngaih erawh a ṭha sawt ang.

Barcelona aṭanga koh kir Antoine Griezmann-a'n Atletico a kir hnuah goal a la khung leh lo a, French forward hian fan-te rinna nei let turin goal khung a mamawh. Tlarhmaah Joao Felix leh Luis Suarez an la awm cheu a, an 'form' phawt chuan goal khung kawngah Atletico an ngaihtuahawm loh.

Ibra tel lohna
Milan-in Liverpool lakah an chhuanvawr Zlatan Ibrahimovic an chhawr thei lo a, zaninah pawh Ibrahimovic inlan theih a la rinawm chiah lo a, training zawm tawh mah se mimal angin training a la nei a, team training a la zawm lo.

Mahse, heti chung hian ngaihthah chi an ni lo tih chu Reds-in an hria ang - Liverpool mutthluk zeuh laiin goal hnih an khung a, a tawpah tlawm mah se an huaisenna erawh fak tlak a ni - Atletico lakah chak an beisei ngam ang.

Italian club hian Serie A lamah chuan season duhawm tak an hmang mek. Match ruk an khelh tawhah tlawm an la nei lo a, vawi nga chakin vawi khat an khingpui an inhnehtawkpui a, zaninah mahni muala inkhel tur an ni bawk tih hriat tel a ṭha.