Vawi 100 chak thei Lewis Hamilton

Lewis Hamilton chuan Formula 1 huangah vawi 100 teh meuh hnehna a chang tling ta. Car intlansiakna sang berah hian vawi khat chauh pawh chak a harsa, mahse British tlangval hian driver dang zawng zawngin an la tih ve theih ngai loh mellung chu a phun ta a ni.

Pathianni zana tlan zawh tawh Russian Grand Prix chu a tawp lamah ruah sur vangin an buai, a vawi khat nana chak beisei Lando Norris-a'n a tawrh laiin Hamilton erawhin a chhawr ṭangkai thung.

Champion lai Hamilton hian driver championship lamah pawh hma a hruai ve leh ta. Point 246.5 hmuin a chuang berah a awm, a elpui hautak ber Red Bull driver Max Verstappen chuan point 244.5 hmuin an la inhnaih viau.

Tun season F1 hi intlansiak vawi 22 awm tura ruahman a ni a, mahse panga chu hri leng vangin an ṭhulh tawh - tlankawng ṭhenkhatah erawh intlansiak vawi hnih an nei thung. Inelna vawi 15 neih a ni tawh, October 10 hian Turkish Grand Prix an tlan leh ang.

Vawi 100-na
Sochi Autodrom-a intlansiakah Hmailton-a'n palina aṭangin bul a ṭan a, a hmasa ber aṭanga tlan ṭan Norris chu hnehna chang turin a dinhmun a ṭha hman. Mahse, lap nga chauh tlan hmabak an neih tawhah ruah a rawn sur, boruak a thlak danglam ta a ni.

Tlankawng huhah Mercedes driver Hamilton rawn dawk chhuakin dan theih a ni lo, championship lama a elpui Max Verstappen chuan hrem vangin a hnung ber aṭangin tlan ṭan mah se pahnihna dinhmun a luah phak ve bawk.

Hamilton hi F1 huangah hnehna chang hnem ber niin, amah hnaih bertu Michael Schumacher (91 wins) lak aṭangin a fal tawh hle a, a la kal fal belh zel dawn ni pawhin a lang, nomawi chawi hnem lamah pawh German legend (7 titles) hi a nihrual tawh.

A lo thleng ta
Chak tura rinkai a nih tawh loh hnuah Hamilton a chak leh a, hnehna ropui bik zinga mi a ni. Hamilton chuan vawi 100 a chak tlin theih hi tun hma aṭanga a lo suangtuah ṭhin a nih thu a sawi a, mahse a beisei phak loh a nih thu a sawi bawk.

Kum 36 mi Hamilton chuan, "Vawi 100 chak tling tur chuan nghah rei a ngai ngei mai. Rilrua ka lo suangthuah ṭhin, mahse a tak thleng tura ka beisei ngam loh chu a lo thleng ta si, a nihna takah chuan team ṭha tak ka neih vang a ni.

"Hripui leng vanga harsatna pawh a reh chho zel, kan rama inelna kan neih ṭum khan hun hlimawm ka lo tawng tawh. Tun ṭuma ka hlimna erawh a danglam bik hle," tiin vawi 100 meuh chak chu ropui a tih thu a sawi.