Pep Guardiola hote khingpui tur Messi?

Nipui bazarah Lionel Messi-a'n a pu hlui Pep Guardiola kaihhruai Manchester City zawm loin Paris Saint-Germain a zawm a, zanin dar 12:30 hian manager ṭha bik Pep-a leh player ropui bik Messi te hi Parc des Princes-ah an inhmachhawn dawn.

Premier League champion Man City leh Ligue 1 hmahruaitu PSG inkhel tur hi Champions League group stage-ah chuan en châkawm ber zinga mi a ni a, Mauricio Pochettino hoten an match hmasa bera Club Brugge nen 1-1 a inhnehtawk avangin zanin inkhel a hmuhnawm sawt ang.

Group A inkhel dangah zanin dar 12:30 hian RB Leipzig-in Club Brugge an mikhual dawn. Leipzig hian match hmasa bera Man City an hneh loh avangin group stage paltlang an duh a nih chuan Belgian club lakah point thum hmuh ngei a ṭul a ni.

Messi chu
Lionel Messi-a'n rin loh takin Barcelona a chhuahsan thut a, mak ti zingah Pep Guardiola pawh a tel. Argentina captain chanchinin ngaihven a hlawh a, amaherawhchu beisei angin Messi hi khelmualah a la che ṭha lo.

Kum 34 mi Messi hi Lyon nen an inkhelh ṭumah a inhliam avangin PSG-in Metz (2-1) leh Montpellier (2-0) an hneh ṭumin squad-ah a tel lo. Argentine forward hi Man City hmachhawn lo thei dinhmunah a ding.

Messi hian PSG tan vawi hnih inkhel bul a ṭan tawh a, vawi khat bench aṭanga lut bawkin goal emaw asisst emaw a la nei lo. Lyon nen an inkhelh ṭum hian 1-1 a nih laiin minute 76-naah lakchhuah a ni a, Argentine forward hian a chetzia hmangin coach Poch lakah a lungawi lo tih a lantir.

Khawvel player ṭha ber zinga mi Messi hi a dam ṭha a nih phawt chuan ropui takin khelmualah a rawn khelh leh ngei a rinawm a, chutihrualin mi bik a nih miau avangin en bik a ni a, a inlan chhungah khel chhe lo mah se goal leh assist a la neih tlat loh avangin sawiseltu pawh an awm der tawh.

Messi inlar hun?
Zanin hian Messi a khel dawn em tih he thuziah lai hi chuan a la hriat lo a, a khel thei a nih erawh chuan Man City tan ven uluk bik a ṭul dawn. Argentina captain hian Pep Guardiola hote hi ṭum li a hmachhawn tawh a, goal ruk a khung!

Barcelona kawr haa Messi hmachhawn hi Bayern Munich leh Man City te an ni a, ṭum khat chakin ṭum khat chak lo ve ve mah se aggregate hmangin hnehna a chang ve ve.

Pep hi Messi ngaisangtu a ni a, khawi position-ah pawh player ṭha ber a ni ang, ti hialin a fak tawh. Chuvangin Messi hi a khel thei a nih chuan Man City-in an ven uluk a ṭul dawn a, chutihrualin Messi bakah Neymar leh Kylian Mbappe te an la awm tih hriat a ṭha bawk.

100% PSG
PSG-in Messi bakah player thar Sergio Ramos tel loin Ligue 1-a match riat an khelhah hnehna an chang vek. Euro 2020 best keeper Gianluigi Donnarumma meuh pawhin khelhna hmun chan a harsat a, zaninah pawh hian Keylor Navas zawkin bul a ṭan a nih pawhin mak ti suh.

Man City lakah hian hliam vangin Ramos bakah Marco Verratti a la inlan thei dawn lo a, hrem vangin Angel Di Maria a la khel thei dawn lo bawk. Argentine forward Messi pawh hi la awm lo se; tlarhmaah Neymar, Mbappe leh Julian Draxler te an la tlar thei ang.

PSG-in league lama result ṭha an neih theih nan Inter Milan aṭanga an lakluh Achraf Hakimi a che ṭha. Mahse, French club hian Champions League lamah result ṭha an la nei lo. Brugge laka an khelh dan thlir chuan point khat an hmu hi an vannei zawk a, Man City lakah insiamṭhat an mamawh hle.

Champion lai hnehtu
Manchester City-in season bul an ṭan ṭhat tawk loh avangin sawisel an hlawh a, Premier League lamah chuan Champions League champion lai Chelsea fakna a ri ring hman hle. Blues hi club ṭha bera an chhal lai takin Pep Guardiola hote theihna a lang a, Stamford Bridge an luhchhuah.

Premier League champion hian Blues hi Gabriel Jesus goal hmangin kartawp khan an hneh a, an chakna zat aia ropui chu an khelh dan a ni. Man City hian Stamford Bridge-a an khelh dan chiah a, Parc des Princes-a an khel nawn thei a nih chuan league chauh ni loin Champions League champion thei tura rinkai an ni leh thei ang.

Man City tan player thar Jack Grealish a che ṭha ṭan a, Kevin de Bruyne leh Phil Foden te an thiam ngaiin an la thiam reng. Tlarhnung lamah Ruben Dias leh Aymeric Laporte te an inkawp rem a, keeper Ederson a ṭhat bawk avangin khualmuala khel tur ni mah se PSG aiin an buk a rit mah ang.