Hliam a dam ta Jimenez-a'n goal a khung

Ni 336 chu rei tak a ni - striker goal khung uar ve tak Raul Jimenez-a'n hetianga rei hi goal khung turin a nghak a, a nghak chhuak ta. Football khawvelin Mexican striker hi a lawmpui.

Pathianni zan khan Wolverhampton Wanderers chuan an mikhualna ramah Southampton chu 1-0 in an hneh a, inkhela goal awmchhun hi Jimenez-a'n minute 61-naa a khung a ni a, Saints-in a chhanletna tur an nei lo.

Kum 30 mi Jimenez hian November 2020 khan Arsenal nen an inkhelh ṭumin a luah hliam a tuar a, David Luiz nen ball an inchuhna lamah an intauh a, Luiz-a'n hliam tenau a neih laiin Mexican striker erawh a lu ruh a khi.

Jimenez hi rei tak enkawl zui a ni a, lu ruh venna khum chungin a inkhel ṭhin - Mexican striker hian thla hmasa lawk khan khelmuala a kir thei chu thilmak a nih thu a sawi a, tunah chuan goal hial a khung leh ta.

Hliam a neih hmaa European club liante nen pawha sawizawm ni hman Jimenez chuan, "Nuam ka ti takzet a, he hun tawng tur hian theihtawp ka chhuah reng a, a lo thleng ngei dawn tih hi ka hre reng a ni," a ti.

Mexico tan vawi 86 inlana goal 27 khung thei striker chuan, "He goal hi ka tan chauh a ni lo a, ka chhungte, doctor, physio leh engtiklai pawha min ringhlel loa ka lam ṭang tlat ṭhinte tan a ni," a ti zui a, a hlim hle.

Wolves boss Bruno Lage chuan, "He goal hi Raul tan a hlu takzet. Top player a ni a, inrintawk nan he goal hi a mamawh a ni," tiin a sawi.

Jimenez hian hliam a tawrh hma khan Wolves tan inelna hrang hrangah match 110 a khel hman a, goal 48 khungin assist vawi 18 a nei hman - goal a khung ve leh ta a, Wolves pawh an phur sawt ang. League match ruk an khelha vawi hnih an chakna chiah a ni.