Benzema dah sangtu Ancelotti

Real Madrid manager Carlo Ancelotti chuan Karim Benzema a dah sang hle, a striker hian mimal chawimawina sang Ballon d'Or hial pawh dawn a phu tih a sawi chhuak.

France international hian tun season La Liga-ah goal riat a khung tawh a, a ṭhiante khung tur vawi sarih a siamsak tawh bawk - duhthusama ṭhain season bul a ṭan tia sawi ngam a ni.

Ancelotti chuan, "Khawvela player ṭha berte zinga mi a ni," tiin a striker a dah sang hle a, season hmasa leh tun season a hman dan chu player dangte chunga leng a nih thu a sawi bawk.

Italian manager kaihhruaina hnuaiah hian Benzema bakah Vinicius Junior chuan vanglai a tawng chho mek a, tlarhma lamah rinrawl an ni - league bakah Champions League thlenga chet ṭhat an tum ang.

Spanish club lian hian zanin dar 12:30 hian UCL group match khel turin Sheriff Tiraspol an mikhual dawn. Moldovan club nen hian an vawi khat intawnna tur a ni a, Sheriff hian match hmasa berah Shakhtar Donetsk 2-0 in an hneh. Group D inkhel dangah Shakhtar Donetsk hian zanin dar 10:15 hian Italian champion Inter Milan an hmachhawn ang.