Barca tan number 10 a lang ta - Messi aiah Fati

Lionel Messi chhuah hnua Bar-celona-in Argentine forward hak ṭhin number 10 an pek chu rawlthar duhawm Ansu Fati a ni a, mi tam takin khawvela footballer ṭha ber ang hiala an ngaih Messi kalsan jersey ha tur chuan Fati an ring tawk lo.

Mahse, hliam vanga a chawlh reng hnuin kum 18 mi forward hian jersey number 10 nen goal a rawn khung a, an mikhual Levante lakah Barcelona chu 3-0 in hnehna a chanpui.

Catalan club tan Memphis Depay (penalty) leh Luuk de Jong ten goal khat ve ve an khung bawk a, mikhual inthlahrung Levante lamin a chhanletna tur an nei thei lo.

Barcelona-in hnehna an chan avangin table-ah parukna an ni zui a, hmahruaitu Real Madrid chu match khata khel tlem chungin point ngain an phak lo mek - Catalan club an la chhe lutuk lo e!

Dutch football
Barcelona-in minute 14 chhungin goal hnih an khung hman a, goal hi Dutch player khung ve ve a ni. Inkhel ṭan aṭanga minute rukna lekah Levante defensive midfielder Nemanja Radoja chuan Depay a ti tlu a, penalty a chawi.

Depay-a'n penalty hi harsatna nei loin goal-ah a chantir a, Barca a pan hnuah league match ruk aṭanga goal thum a khungna a ni - assist vawi khat a nei a, Barca-in thlen san an duh chuan Depay chet ṭhat zel a ṭul ang.

Barcelona-in mikhual lakah ṭhat chhuah an tum lo. Minute 14-naah Luuk de Jong a inlar ve leh a, Depay ang thoa Dutch forward hian Sergino Dest-a ball pek chu um lutin goal-ah a chantir.

Kum 31 mi forward hian Barca sum neih loh zarzoin Catalan club hi a zawm a, rin a hlawh lo. Mahse, league match thum a khelhah Catalan club tana a goal hmasa ber a khung a, PSV Eindhoven tana match 204-a goal 138 khung thei kha a la ni reng tih kan hmu.

Duhtak Fati
Barca tan Fati-a'n hliam vanga thla sawm dawn deuhthaw khelmual a rah loh hnuin minute 81-naah De Jong a thlak a, nikum November thlatira a inhliam laia thla li lek chawl tura ngaih kha a chawlh rei tak em avangin khelmuala a lo kir ringawt pawh hi Barca fans tan chuan lawmna tham a ni.

Catalan club ṭantute lawmna belhchhah turin Fati hian awm mai mai a tum lo a, hun pek belh minute khatnaah a dam chiang tawh tih pholan nan goal a rawn khung - Barca fan-ten an number 10 tharah Messi hlimthla hmuh zel an duh dawn.

Fati hian season hmasa a inhliam hma khan inelna hrang hrangah match 10 khelin goal nga a khung hman a, 2019-20 season khan reserve team tan pawha a la inlan hma hauhin senior team tan a inlan nghal a, a season khatnaah match 31 khelin goal riat a khung nghal.

Spain tana vawi li inlana goal khat khungtu Fati hian Barca tan match 44-ah goal 14 a khung ta a, kum 18 leh ni 330 mi a ni - hetiang ang kum zat a nih khan Messi-a'n Barca tan goal kua chiah a khung.

Barca & Koeman
Tun hnaiah Barcelona coach Ronaldo Koeman leh president Joan Laporta te an inhmu thiam lo a, league match ngaah vawi hnih chauh an chak bawk avangin Dutch coach dinhmun a derthawng hlea sawi a ni.

Barca hian Koeman an ban chuan zângnadawmna an pek a ngai dawn a, coach thar hlawhah insen a ngai dawn bawk - heng zawng zawng avang hian an la dawh mai mai nia sawi a awm a, tunah chuan 'dawhtheih' chhan tur ṭha tak an nei ve leh thei ta.

Koeman hian hrem a nih avangin khelmualah Barca a la ho thei rih lo a, October 3-a Atletico Madrid an lenchilh hunah a la inlan thei dawn lo bawk a, Nilaini zan Champions League-a Benfica an lenchilh hunah erawh harsatna a awm lo ang.

Dutch coach hian Levante an hmachhawn hmain an team chu indinthar mek an nih thu leh hun a duh tur thu a sawi a, Pathianni zanah hian kum 17 mi Gavi, Nico González (19), Eric García (20), Sergiño Dest (20)leh Óscar Mingueza (22) ten bul an ṭan a, bench aṭangin Yusuf Demir (18) leh Riqui Puig (22) te an lut bawk.