Falcao-a'n goal khung a ṭhulh thei lo

Radamel Falcao i la hria em? FC Porto, Atletico Madrid leh AS Monaco tana an goal khung khawl ni ṭhin kha - tunah chuan La Liga kai thar club Rayo Vallecano tan a khel tawh a, Spanish club a zawm hnua match thum a khelhah goal a khung vek!

Rayo Vallecano hian Pathianni zan khan mikhual Cadiz chu 2-1 in an hneh a, mikhual team lakah hian Álvaro García Rivera chuan minute kuana lekah goal hmahruai a khung.

Mahse, Cadiz tan centre back Varazdat Haroyan chuan si phurh a rawn sut a, beiseina thar a siam. Mahse, La Liga a kir hnuah Falcao-a'n a tikimtu mai nih duh loin minute 44-naah a khung ve leh a, Isi Palazon chuan a hnu rawn kharin 3-1 in Rayo an chak.

Coach kum 39 mi Andoni Iraola kaihhruaina hnuaiah Rayo hian an league match hnuhnung pathumah hnehna an chang vek a, heng inkhelah te hian Falcao-a'n goal a khung vek a, Athletic Bilbaa laka a khung phei chu hun pek belha chakna goal a ni.

Kum 35 mi striker hian nipui transfer khan Galatasaray chhuahsanin Rayo hi a zawm a, Turkish club-ah pawh hian match 43 khelin goal 20 a khung a, a che chhe hran lo.