Pedro-a'n Mourinho a lam khum

Jose Mourinho-a'n AS Roma a zawmtirh kha Pedro chu a ruahmanna a tel loh thu a hrilh a, Spanish forward hian amah aia thu zawk a ngam loh avangin a puanthuah telin Lazio a pan san.

Pathianni zan khan Stadio Olimpico-ah Lazio hian AS Roma mikhualin 3-2 in an hneh a, an goal hnihna khungtu Pedro chuan a goal lawm nan Mourinho hmaah a tlan khum a, amah duh loa hnawltu chu a tihel let.

Lazio tan Serej Milinkovic-Savic, Pedro leh Felipe Anderson ten goal khat ṭheuh an khung, mikhual team lamin Ibanez leh Jordan Veretout-a penalty hmangin chhang let ve mah se si phurh an sut zo thei lo.

Mourinho hian a club thar hi Serie A match hmasa panga aṭangin vawi li a chak pui, mahse Verona leh Lazio an ngam loh avangin nomawi a hla ta sawt. Hmahruaitu Napoli an phak lohna chu point ruk a ni der tawh.