Juventus an chak zawn

Season bul ṭan fuh lo mah se Juventus an insiamṭha chho zel. Old Lady hian an mikhual Sampdoria 3-2 in an hneh hram a, point riat hmuin a sang zual 10 zingah an inhlangkai ve leh ta.

Serie A hmahruaitu erawh Napoli an ni. League match ruk khelh tawhah Napoli hi an la chak fai vek, club record an siam mek chhawm nung tur hian an mikhual Cagliari chu 2-0 in an hneh.

Juve an chak
Paulo Dybala-a'n minute 10-na lekah goal hmahruai a khung a, mahse captain armband hrengtu forward hi minute 22-naah hliam vanga lak chhuah zui a ngai a, eng chena rei nge chawlh a ngaih dawn hriat a la ni lo.

Leonardo Bonucci-a'n penalty chhuih lutin an hmahruaina a belhchhah a, chawlhlawk hma chiahin mikhual lamin Maya Yoshida-a tauh luh hmangin an sut ṭhen, second half tir lamah Manuel Locatelli chuan a khung belh bawk.

Old Lady hi an inkhel a la nghet lo, hun tawp dawnah Antonio Candreva an ven hneh loh avangin goal an chhuah a, manager thar Massimiliano Allegri naute hian an goal neihsa an hum zo lo lek lek a ni.

100% Napoli
Victor Osimhen-a'n goal a khung bakah penalty a hlawh chhuak a, a penalty hmuh hi Lorenzo Insigne chuan goal-a chantirin Napoli chu Cagliari lakah nuamsa takin an chak, a zawnin league match ruk an chak ta.

Nigeria international Osimhen hian season hmasa khan Lille aṭangin Napoli a zawm. Italian club tan hian a season hmasa berah league match 24 aṭangin goal 10 a khung, tun season-ah chuan match nga aṭangin goal li a khung ta - an chakna hnar pawimawh a ni.

Luciano Spalletti enkawl team hi Europa League-ah khan Leicester City lakah an chesual zauh, a bakah chuan an khel ṭha thei hle. Ningani zana Spartak Moscow nen an inkhelh hunah pawh result ṭha neih an tum ang.