Arsenal mangtha tur Arsene Wenger

"Arsenal tan hian ka thiamna leh theihna zawng zawng sengin ka thawk ṭhin. Hun rei tak chhung he club ropui tak tana hna ka thawk thei hi ka lawmin, hriatreng tur ka ngah hle. Arsenal hmangaihtute u, club hlutna hi lo vawng nung reng ang che u," tiin Arsene Wenger chuan a hmangaih Arsenal nen an inṭhen tur thu a sawi!

Arsenal manager Wenger chuan nimin chawhnu lam khan season tawp rualin Gunenrs enkawl hna a chawlhsan tur thu a sawi chiang a, nipui laia kum hnih daih contract a ziah chu hmang zo loin a chhuak dawn tihna a ni. French manager hian tun season a zawh hunah chuan a puanthuah telin Emirates Stadium a chhuahsan dawn.

Kum 68 mi Wenger hian September 1996 aṭangin Arsenal a enkawl ṭan a, tun dinhmunah Premier League manager ṭang lai zinga mahni hna ngai chelh rei ber a ni. League nomawi vawi thum bakah FA Cup vawi sarih chawiin, 1998 leh 2002 te khan league leh FA Cup te hi a chawi kawp hial.

Tun dinhmun
Arsene Wenger-a'n a enkawl hnua a vawi khat nan season hmasa khan Arsenal hi league-ah palina an ni phak lo a, tun season-ah Europa League an khelh phah. Tun dinhmunah pawh parukna ni mekin season thara Champions League khel tur chuan Europa League champion nih an ngai tawh.

Tun season chhungin Gunners hi league-ah vawi 11 an tlawm tawh a, Wenger-a'n a enkawl chinah an chetchhiat ber ṭum an tawng mek. Champion chiang tawh Manchester City chu point 33 zetin an phak lo, City an tluk lohna zat tho hian table mawngphaha awm West Brom nen an inthlau bawk.

Mahse, Stan Kroenke-a'n an manager hnathawh ṭhat a hmuhhmaih duh lo. Arsenal-a neitu nihna nei hnem ber Kroenke chuan, "Hun rei tak chhung ngelnghet taka football hmuhnawm a khelhpui tawhna hi engtikah mah tluk theih a ni lo ang," tiin match 823 chhung kaihruai tawhthu manager chungchang a sawi.

American sumdawng hausa Kroenke-a'n an tan ni duhawm lo ber pakhat a nih thu a sawi bawk a, Kroenke chuan, "Arsenal nihna tak leh English football chu a thluak hmangin a hrualkhawm a, inkhel hmuhnawm leh mipui ngainat em em bik a chhawp chhuak a ni. Khelmual chhungah leh a pawnah pawh hotupa a ni," a ti.

Zinkawng hautak
Premier League vawi thum champion Wenger hian 2003-04 khan hneh loh nei loin a naute chu league nomawi a chawipui a, he a sulhnu ropui 'Invincibles' hi Wenger-a chanchin ngaihnawm lai an sawi apiangin hmaih a ni tawh ngai dawn lo.

Invincibles hnuah Arsenal an ropui chhunzawm thei mai lo, 2005 khan FA Cup an chawi a, nomawi dang chawi leh tur erawh chuan ni 3,283 zet an nghah a ngai. 2014 FA Cup final-ah Hull City hnehin kum kua zet an hlawhchham hnuah hlim ni an tawng ve leh chiah.

Season hmasa khan Wenger-a'n a vawi sarih nan FA Cup a chawi a, Wembley Stadium-ah Chelsea chu 2-1 in an hneh a ni. Amaherawhchu, Antonio Conte naute hi league lamah erawh point 18 zetin an phak lo thung.

English football-ah hlawhtling viau mah se Europe lamah chuan sulhnu ṭha a hnutchhiah tam lo hle. 2006 Champions League final-ah Barcelona an ngam lo a, a zawnin season sarih chhung zet chu UCL last 16 aṭanga petchhuah an ni bawk. European club ṭhate inelna liana an inlan hnuhnung ber chu 2017 kha niin Bayern Munich chu 10-2 in an ngam lo.

Mahse maw, Arsene Wenger hian a elpui dangte angin player lei nan sum a hmang hnem ve vak ngai lo. Highbury chhuahsanin kum 2006 khan pound maktaduai 390 man Emirates Stadium an luah lut a, England-a khelmual ṭha leh changkang berte zinga mi an neih theih chhan langsar pakhat chu Wenger-a'n sum hman leh enkawl a thiam vang a ni.

Stadium thar an luah aṭangin kum 11 a liam leh tawh a, Gunners sum dinhmun pawh a ngelnghet leh tawh hle. Nipui bazar lai khan Lyon aṭangin pound maktaduai 46.5 man Alexandre Lacazette an lalut. France striker hi a hunlai chuan an player manto ber niin, January thla khan an khum lehnghal - Gabon striker Pierre-Emerick Aubameyang chu pound maktaduai 56 in an lei zui leh bawk.

Chhuak dawn mah se Wenger hian a club chu sum ngah takin a chhuahsan dawn tih a hriat theih a, a hna chhunzawm tur tan hmalak a awlsam phah ang. A player lakkhawm sate pawh remkhawm fuh an nih phawt chuan hlawhtlinpui theih tur an ni tawh hlawm.

Next Season
Arsene Wenger a chhuah hma aṭangin amah thlak tur an inrinsiak tawh a, a chhuak dawn tih a chian tak hnuah phei chuan thuthang a tam zual ngei ang. Borussia Dortmund manager Thomas Tuchel chu hming langsra ni mah se Tuchel hi Paris Saint-Germain nen sawi zawm a ni mek bawk.

Arsenal hian sum an hmang phal a nih chuan khawvel manager ṭha chu an lalut thei dawn tih a chiang. Germany enkawl mektu Joachim Low bakah Real Madrid, AC Milan leh Chelsea manager hlawhtling ni tawh Carlo Ancelotti chu hming langsar an ni. Wenger-a'n "Arsenal enkawl turin theihna a nei," tia a sawi Patrick Vieira hming a ri ring hle bawk a ni.

An duh leh beisei ang result an neih loh avangin Arsenal hmangaih tuten "Wenger Out" tih ṭawngkam an hmang fo. Amaherawhchu, a hnathawh leh club tana hmasawnna a thlen dan hrechiang tute chuan an ṭan tlat thung.

Wenger chhuak tura duhtute pawh in 'ban' loin ama duh thu ngeia club a chhauhsan hi an duhthusam a ni zawk ngei ang. Ṭhangtharten Arsene a tel lohna Arsenal an hmu dawn a, tun hma lama an sulhnu ropui neih tawh hi an khum kher lo a nih pawhin beiseina thar nen "Next Season" an hmuak dawn a ni.