Premier League thlasik chawlh a chiang dawn

Hun rei tak chhung an lo buaipui tawh Premier League-a kar hnih chhung thlasik chawlh neih ṭhin tawh tur chu season tawp hmaa tihchian hman beisei a ni a, ruahman anga engkim a kaltluang a nih chuan kum 2020 aṭangin thlasik chawlh hi hman tur a ni.

Thlasik chawlh hi hman ni dawn mah se English football-a hun rei tak an lo kalpui tawh Krismas laia inkhelh erawh a awm reng dawn tho a, chawlh hi January thla tawp lam leh February thla tir lamah hman ṭhin tur a ni ang.

Football Association chuan thutlukna hi chiang takin la siam lo mah se Premier League leh English Football League thuneitute nen FA hian inremna an nei thlap tawh. FA hi Nilaini khan an ṭhukhawm a, thlasik chawlh chungchang bakah hian FA Cup an sawi tel bawk.

FA Cup-ah hian fifth round chu kar laihawlah replay awm loin khelh ṭhin tawh tur a ni a, third leh fourth round-ah erawh replay a awm tawh ṭhin ang.