I League aia chungnung zawk ISL ; Indian Super Cup champion Bengaluru FC

Indian Super League leh I League club inelna Indian Super Cup champion chu ISL club Bengaluru FC an ni a, I League club East Bengal chu nimin khan final-ah 4-1 in an sawp.

East Bengal technical director Subhash Bhowmick-a'n Bengaluru tlarhma hlauhawm Miku leh Sunil Chhetri dan dan an hria niin sawi mah se a thusawi dikna hmuh tur a awm lo. Rahul Bheke, Miku leh Sunil Chhetri (2) ten goal an khung a, Kolkata club tana Ansumana Kromah goal mawi chu a tawpah chuan scoreline timawitu chauh a ni.

Bengaluru tana tun season-a goal 20 khungtu Sunil Chhetri chuan, "Season duhawm tak kan hmang a, ka season hman ṭhat ber ni hialin ka hria. Kan hlawhtlinna avangin kan lawm a, chutihrualin kan la duhtawk lo. Nakkumah kan lo kir leh ang," a ti a, season thar a thlir nghal.

Kromah goal mawi
Inkhel ṭantir aṭangin team pahnih an innawr nghal a, East Bengal an langsar zawk. Ansumana Kromah-a'n minute sarihnaah 'long ball' a um lut a, fing taka ball a lak hnuah goal ruaka pet goal chauh a hmabak ni tawh mah se Bengaluru goalkeeper Gurpreet Singh Sandhu chuan a kein a tlawh tlu a, hnung lam aṭangin John Johnson chuan a lo pawt ve bawk.

Goal ngeina tur nia ngaihah Bengaluru hlauhawm takin che mah se referee-in yellow card bak phawrhna turah a ruat lo a, Punjabi keeper Gurpreet leh John Johnson te an vannei. East Bengal an hlauhawm chhunzawm a, Laldanmawia Ralte, Katsumi Yusa leh Mahmoud Al Amna kan inhmuh chhawk.

Minute 28-na a her chhuak a, Kromah bawk a inlar. Katsumi corner chu Gurpreet-a'n a hnek chhuak na tawk lo a, Liberian striker bulah a tla - Mohun Bagan duh loh hnu hian boruak kanga in vawrh chungin a bin lut a, a mawi takzet.

Miku & Chhetri
Semifinal-ah Mohun Bagan-in Bengaluru laka goal an khung hmasa chungin Bangalore club goal nawr na tak an dawl zo lo a, East Bengal nena champion inchuh inkhelah thawnthu a danglam tam lo. Minute 40-naah Blues-in an si phurh an sut nghal a, corner aṭanga ball kal chu Rahul Bheke chuan ṭha zetin a tauh lut - goal zawna ding Lalramchullova'n tih theih a nei lo.

East Bengal an talbuai zui a, Samad Ali Mallick-a'n amah tackle tu Subhasish Bose lakah a thinrimna a thup zo lo a, a hmaiah a 'chum' avangin hnawhchhuah a ni. Player pakhata an kim loh hnuah Kolkata club hi talbuai sawt tura ngaih an ni a, mahse second half ṭan ṭha zawk an ni - mahse Cavin Lobo goal shot per pet luttu Kromah goal chu offside vangin pawm a ni lo.

Inkhel a rei a, Bengaluru an chungnung tulh tulh. Gurwinder Singh-a'n penalty area-ah a kuta ball a ben avangin Blues-in penalty an hlawh chhuak a, Chhetri-a'n a chhuih lut. Blues fans hlim authawm pawh a reh hmain Miku-a'n a 'class' pholangin an goal thumna a khung a, minute 90-naah Sunil Chhetri-a'n tauh lut lehin Bengaluru an champion.