Copa del Rey final Barcelona tan nomawi a hnai?

Zanin dar 1:00-ah Copa del Rey final khelh a ni dawn a, Barcelona leh Sevilla an inkhel dawn - thla hmasa thleng kha chuan Barca-in treble champion nih beisei mah se AS Roma-in Champions League aṭangin an pet chhuak a, tunah chuan 'nomawi double' chu an beisei theih a ni ta.

La Liga lamah chuan Barca hi league match 33 chhung an tlawm tawh lo a, anmahni hnaih bertu Atletico Madrid chuan Ningani zan khan 0-3 a Real Sociedad an ngam loh avangin league match nga khelh an la hmabakah champion turin point thum chiah an mamawh tawh.

A tawi zawnga sawifiah dawn chuan Barca hian league leh Spanish Cup nomawi chawi turin vawi khat chak ve ve chiah an mamawh tawh a, Champions League-a an mualphona thaibo hna chu an kuta awm a ni a, zanin hi hna hmasa thawh hun chu a ni.

Min hrilh rawh thawnthu hlui...
Lehkha pheka team pahnih squad thlir mai chuan Barcelona hi chak tur chiang­saa dah ngam a ni a, khelmuala team pahnih intawn tawhna thlirlet erawh chuan thawnthu dang hrilh kan ni thung.

Tun season-ah team pahnih hi vawi hnih an intawng tawh a, point ruk awm aṭang­in Barcelona-in point li an hlawh chhuak - an khelh dan en erawhin Catalan club hi inchhuang thei an awm bik lo.

An intawn hmasakah Barca hi 2-1 in an chak hram a, intawn hnuhnung zawkah minute 88 leh 89-naa an goal avangin point khat an hlawh chhuak hram.

Hmanah chuan maw...
Barcelona-in zaninah Copa del Rey nomawi an chawi a nih chuan season li chhung a zawna Spanish Cup-a an champion-na a ni dawn tihna a ni a, inchhuanpui tham a ni. Barcelona hian kum 2016 Copa del Rey final-ah khan 2-0 in Sevilla hi an lo hneh tawh.

Hriat tel atana ṭha erawh Barca hian extra time-ah goal hnih hi an khung ve chauh - extra time-ah hian Sevilla player pahnih hnawhchhuah an ni. He inkhel 'hot' takah hian Javier Mascherano chu minute 36-naah hnawhchhuah a ni a, player 10-a khel Barca-in extra time an thleng thei.

Mahse, 90+2-ah Sevilla player pawimawh Ever Banega hnawhchhuah a ni ve leh a, minute 120-naah Daniel Carrico hnawhchhuah a ni bawk. Barca goal hnih hi Sevilla player pahnih hnawhchhuah an nih hnu ve ve a lut a ni a, kum hnih liam taa an chetsualnaah Sevilla-in chetsual nawn an duh lo ang.

Barca inbuatsaihna
Barcelona boss Ernesto Valverde-a'n Copa del Rey-ah nomawi chawi ngei a duh tih chiang takin a pholang a, an league match hnuhnung bera Celta Vigo an hmachhawn ṭum pawhin La Liga lama an kaltluang record chhawm nun aiin player chawlh hahdamtir a ngai pawimawh zawk.

Lionel Messi leh Luis Suarez te bench-a dahtu Spanish mana­ger hi a thutluknaah a tlan­chhe lo, "Inrinni zana Cup final kan khelh tur thlir chungin player ka siksawi a ni," a ti a, Sevil­la tum hautak tur zia a hre lawk.

Catalan club hian Roma laka inhliam Ivan Rakitic an chhawr thei tawh dawn a, Messi, Suarez, Jordi Alba, Gerard Pique, Andres Iniesta, Sergio Busquets leh Samuel Umtiti-te chu Celta laka inkhel bul an ṭan loh hnuah starting XI-a awm turin an inpeih leh tawh bawk.

Sevilla lam hawi ila...
Sevilla-in league lamah beisei an phak lo a, pasarihna dinhmun an luah mek. Champions League lamah lah last 16 aṭanga petchhuah an ni a, Copa del Rey hi coach Vincenzo Montella tan a mualpho khuh nana remchang ber a ni.

Paris Saint-Germain-a sea­son tawp ruala a contract tawp tawh tur coach Unai Emery chu Sevilla-ah hian kir leh tura sawi thawm a awm a, hei hi thudik a nih chuan Europa League nomawi vawi thum chawipuitu coach hi fan-ten kut pharin an lo lawm ang.

AC Milan boss hlui Montella tan hei hi thu hriat nuam tak a ni lo ang tih a chiang a, Sevilla a chhuahsan dawn a nih pawhin hmingṭha taka chhuahsan tur chuan Copa del Rey nomawi a chawi a ṭul ang.

Sevilla dinhmun
Sevilla tan Simon Kjaer chuan malpui hliam vangin Barcelona a hmachhawn theih a beiseiawm loh a, Sebastien Corchia-a'n a kap bawra hliam a neih a la buaipui reng a, cup final a la khel thei dawn lo.

Luis Muriel leh Pablo Sara­bia erawh Barcelona hma­chhawn turin an dam hman dawn a, an league match hnu­hnung bera Deportivo La Coruna nen an inhnehtawk ṭuma inlan thei lo pahnih duhthlan tur zinga an tel ta hi Sevilla tan chanchin lawmawm a ni.

Sevilla hian tun season-a goal 19 khung tawh Wissam Ben Yedder, defensive mid­fielder Steven Nzonzi, midfielder langsar Ever Banega leh Man­chester City striker hlui Nolito te an nei bawk a, an khelh ṭhat ni chuan Barcelona hneh turin an ṭha tawk.