Rossi leh Marquez zilhtu Jack Miler

Ducati rider Jack Miller chuan Valentino Rossi leh Marc Marquez te chuan tlangkawnga an thil tih maksak chu tawp san se a duh thu a sawi a, MotoGP rider-te him nan pawh a ṭhat tur thu a sawi bawk.

Khawvel rider ṭha pahnih Rossi leh Marquez te hi langsar takin vawi khat ve ve an inti palh tawh a, intlansiak hnuhnung ber Argentine Grand Prix-ah Honda rider Marquez-a'n Rossi chu track aṭangin a nek chhuak a ni.

Miller chuan, "A nihna takah chuan rider-te hian kan nunna kan thap a, kan him tlan a pawimawhin fans lam pawhin inelna thianghlim leh hmuhnawm hmuh an phu. Anni pahnih hian an thiltih tawh ang hi ti nawn tawh lo se ka duh, hringnun hi a rei loin a hlu a ni tih kan hriat nawn ka duh takzet," tiin a sawi.

Ducati rider chuan sawi zawmin, "Thiang­hlim taka inel tur a ni a, kan rilru leh theihna zawng zawng pawh kan hmang tur a ni. Chutih­rualin dik lo takin kan lanchhuahtir tur a ni lo," tiin a sawi.

Tun season chhungin MotoGP intlansiak vawi hnih a awm tawh a, a vawi thumna turin Pathianni zan dar 12:30-ah Grand Prix of the America an tlan ang.