Spurs vs United Nomawi zinkawngah tu nge dingchang dawn?

Manchester United manager Jose Mourinho-a'n tun hnaia sawi nuam a tih tak chu, "Nomawi chawi dan ka hria a, ram hrang hranga ka record-in chu chu a hrilhfiah," tih hi a ni.

Mourinho thusawiah hnial tur a awm lo. Portuguese manager hi a kalna apiangah nomawiin a zui emaw tih mai tur a ni a, champion theihnaah chuan a champion kim. Chutihruala hriat tel tur erawh 'nomawi chawi dan hria' inti coach hi kutruaka season khar thei dinhmunah a ding mek.

Manchester United-in zanin dar 9:45-ah FA Cup semifinal-ah Tottenham Hotspur an hmachhawn dawn a, United-in hnehna an chang zo lo a nih chuan kuminah nomawi beisei tur an nei tawh lo ang–nomawi chawi dan hria Mourinho leh a naute an hawihil ang.

Mourinho leh vaukhanna
Coach huaisen sawi a nihin Mourinho hming chu lam hmasak pawlah a tel ṭhin. Portuguese manager hi amah leh team ṭhatna tur nia a hriatah chuan huaisen taka thutlukna siam ṭhin mi a ni a, sawiselna a pawisa ngai lo–a hun liam tawhin chu chu a hrilhfiah.

United-in West Brom an hneh loh hnuah pawh Mourinho a lungawi lo tih a hriat a, a naute lakah ṭawngkam a duhtui lo hle. Portuguese manager hian a player zingah 'khel chiang sa' an awm ve loh thu a sawi a, a ṭul hunah chuan tumah bench-ah dah a hreh lo tih a sawi–Mourinho enkawl tawh player ten he thudik zia hi an hria.

Mourinho vaukhannain United player lakah awmzia a nei tih a lang nghal a, Baggies an hneh loh hnuah Bournemouth chu 2-0 in an hneh. United tan result lawmawm a ni a, Spurs hmachhawn tura inbuatsaihna ṭha a ni.

Inlan Tur
Mourinho ṭawngkam avangin United player zingah tuin nge Tottenham hmachhawn dawn tih chu zawhna piang a ni a, Bournemouth laka an khelh dan en chuan Portuguese manager-in duhthlan tur a ngah tih a chiang.

Chelsea boss hlui hian Baggies laka a starting XI aṭangin Bournemouth lakah player pasarih ngawt a thlak danglam a, Cherries laka a rin ngai player a ring vek dawn lo tih erawh a sawi chiang tawh. Mourinho chuan, "Tuna ka starting XI ngai chiah hi Spurs lakah ka hmang dawn lo," a ti.

Inkhel bul ṭan tura a sawi chian erawh Bournemouth laka goal khungtu Romelu Lukaku bakah Antonio Valencia leh Nemanja Matic te an ni a, Cherries laka khel ṭha pahnih Paul Pogba leh Jesse Lingard te pawh bul ṭan tura beisei an ni.

Mourinho faktu Pochettino
Tottenham boss Mauricio Pochettino chuan Mourinho chu khawvela manager ṭha ber pawl a nih thu a sawi. Argentine manager chuan, "Jose Mourinho hi khawvela manager ṭha ber pawl a ni a, chumi pholang tur chuan hna dang a thawh a ngai tawh chuang lo," tiin tuna a thlen chin ringawt pawh a ropui tawk tawh thu a sawi.

Poch chuan United chu anni aia team ṭha zawk an nih thu sawi nghalin, "United hian season duhawm tak an hmang mek a, Premier League-ah keini aia point an ngah zawk miau avangin team ṭha zawk an ni.

"Mourinho hian hna ropui tak a thawk a, team pahnihin final luh loh kan duh dawn loh avangin inkhel hmuhnawm tak a ni bawk ang," a ti a, Wembely-ah inkhel hmuhnawm an phochhuah theih a beisei.

Poch-a buaina
Tottenham Hotspur-in Harry Winks (ngal rek) leh Danny Rose (chawn) te chu hliam vangin an la chhawr thei dawn lo tih an sawi chiang tawh a, hei erawh

Poch-a tan buaina tham niin a lang lo–Spurs manager buaina zawk chu Mourinho-a'n a player a siksawi dan a ni. Poch chuan, "Mourinho hian an ṭhat dan berin a naute a rawn rem ang tih ka ring a, hna awlsam tak a ni dawn lo. United squad pumpui hi a chhah tawk avangin match hautak khel turin kan inbuatsaih a ni," a ti.

Spurs hi hlauthawng tur erawh an ni bik lo. PFA team of the year puan hlima lang thei Jan Vertonghen, Harry Kane leh Christian Eriksen an nei a, anni bakah hian Son Heung-min, Dele Alli, Eric Dier, Moussa Sissoko leh Ben Davies te an la nei cheu bawk a, United laka zam tur an ni lo.

Spurs vanneihna?
Tottenham vanneihna nia chhiar theih chu semifinal khelhna tur Wembley Stadium hi White Hart Lane sak ṭhat mek a nih avanga an home atana an hman a ni a, United aiin England stadium hmingthang hi an hmang thiam zawk ang.

Spurs-in league-a home match an khelh 16 aṭangin vawi hnih chiah an tlawm a, vawi 10 hnehna changin vawi li an khingpui an inhnehtawkpui. FA Cup-ah match thum khelh nan hmang tawhin an chak vek a, Champions League-a home match an khelh vawi liah vawi khat chiah an chak lo bawk.

Wembley-a tun season-a Spurs dinhmun thlirin he stadium hi an hmang thiam tih a lang chiang a, zaninah United lakah an hmang thiam dawn em tih chu a chhanna pek kan ni thuai ang.