World Cup-ah mipui hmuh theih turin VAR

Russia World Cup 2018-a a vawi khat nana hman tur video assistant referees (VAR) chu big screen-ah inkhel entu mipui hmuh theih turin phochhuah ṭhin a ni tawh dawn.

VAR hi Europe-a tualchhung football inelna ṭhenkhatah hman a ni tawh a, sawisel a tawk nasa hle. Mahse, FIFA chuan sawiselna nasa tak karah VAR hmang tur hian thutlukna a siam a, tunah chuan big screen-a pholan turin ruahmanna an siam leh ta.

Tun hnaia VAR sawisel a nihna chhan pakhat hi fan-ten eng vanga thutlukna thlak nge a nih an hmuh theih ve ṭhin loh vang a ni pakhat a, tunah chuan referee-ten video replay-a an en kha fan-te hmuh theih turin pholan a ni ve dawn ta thung a ni.

Mahse, referee-in thutlukna a siam dawn lai erawh chuan big screen-ah tihlan tur a ni lo a, thutlukna a siamfel vek hnuah chauh tihlan ṭhin a ni ang. FIFA chuan hei hi fan-ten referee thutluknaah nghawng an neih loh nana ti an nih thu an sawi.