Rafael Nadal chak laiin Novak Djokovic a tla

World number 1 Rafael Nadal chuan a vawi 11 nana Monte Carlo Masters nomawi chawi turin hmalam a pan zel. Novak Djokovic erawhin a saltanna a la kalsan hleithei lo, Serbian tlangval hi third round paltlang zo loin a zin kawng a tawp.

Ningani zan inkhelah world number 1 hlui Djokovic hi Dominic Thiem lakah 6-7 (2/7), 6-2, 6-3 in a chak lo a, seeded pangana Thiem hian quarterfinal-ah chuan champion lai Nadal a hmachhawn leh dawn a ni.

Kum 30 mi Djokovic hi a kiu hliam dam tawh mah se court chhungah beisei a la phak lo. Nikum July thlaa Wimbledon quarterfinal a luh hnua tournament a khelh leh tawh hoah a thiam pariat zingah a la inhlangkai leh lo a ni.

Djokovic chuan, "A rilru chuan tun hma lama ka khelh ṭhat ṭhin dan kha a hria a, kha mi anga khel tur pawh khan ka bei. Mahse, tunah chuan dawhthei taka nghah hi ka tih tur a ni rih.

Inrintawkna ka la hloh lo a, hliam ka nei leh a nih ngawt loh chuan ka ṭhat dan takin ka khelh chhuah leh hun a la thlen leh ngei ka beisei," tiin a sawi.

King of Clay
Rafel Nadal-a'n tun season chhungin a inkhelh thiamna hmun clay-ah hneh loh a la tawng lo. Nadal hian Russian rawlthar Karen Khachanov lakah 6-3, 6-2 in hnehna a chang a, hnehna chang tur hian darkar khat leh minute 38 bak a mamawh lo.

Spain tlangval Nadal hian thla leha khelh tur French Open atan inbuatsaihna a kalpui mek a, clay court inelna lianah hian a champion thei a nih chuan Grand Slam nomawi 17 a nei tling chiah ang–a chungah vawi 20 champion tawh Roger Federer chiah a awm.

Inkhel dangah seeded pathumna Alexander Zverev chuan German tlangval ve tho Jan-Lennard Struff chu 6-4, 4-6, 6-4 in a hneh. Zverev unaua upa zawk Mischa erawh Richard Gasquet-a'n 6-2, 7-5 in a lo hneh thung. France tlangval Gasquet hian ATP Tour-ah match 500 hnehna a chang tling chiah.

Seeded parukna David Goffin-a'n a khingpui Roberto Bautista Agut lakah harsatna a tawk lo, 6-4, 7-5 a hnehna changin round sang zawk a in vaw kai. Quarterfinal lut phak tura rinkai zinga mi Milos Raonic erawh Marin Cilic nen an inkhelh hmain a khup na vangin a inhnukdawk, seeded pahnihna Cilic-a'n inkhelh hah ngai loin last 16 a paltlang.