Volleyball thiam ber Hunthar Veng
Hunthar Veng chuan Tuichangral hnehin RS Traders Pro Volleyball League nomawi an chawi a, volleyball thiam veng tia hriat hlawh Hunthar-in PVL title an kawl lai humhimin an hmingthan pui ṭhin volleyball hmang ngeiin Mizoram an deng chhuak leh ta.
Zirtawpni zan R. Dengṭhuama Indoor Stadium, Mualpuia inkhelah Hunthar spiker Ranveer chuan point hmasa ber leh hnuhnung ber a hlap chhuak a, India junior team tana khel tawh hian a team hi 25-21, 25-17, 25-22 in hnehna a chanpui.
Rajasthan tlangval Ranveer hian Tuichangral lakah point 34 thawk chhuakin RFL Plastic Player of the Night atan thlan a ni a, PVL3 bikah match a khelh apiangin point 45.7 zel hmuin KT Panasonic Best Spiker lawmman hlan a ni bawk.
Thawhhona
Hunthar Veng coach Vanlalmawia'n league round lama an ngam loh Tuichangral lakah fimkhur a ṭul zia a hria a, an khingpui thiampuipa Shivendra dang turin Lallianmawia Pachuau kutah mawhphurhna hlan a ni. Lianmawia hian hna a tlin hle, KT Panasonic Best Blocker atan an thlang.
Feet 6 leh inches ruk zeta sang Shivendra-a'n match tirah vawi hnih a hlap sual nghal a, set hmasa berah Hunthar lamin 4-0 a hma hruai nghalin, set thumna an khelh laiin an inum tawk ve deuh tih mai lo chu champion lai hi an chungnung tluan chhuak zak a ni.
Hunthar tan 2004 CYMA Volleyball Tournament an champion ṭuma Best Spiker C. Laldawngkima'n an mamawh hunah point a vaw chhuak thei a, tawnhriat a neih ṭhat avangin final boruak sang takah player naupang zawk a ho khawm ṭha hle.
Hunthar tan captain Remsangzuala leh C. Laldawngkima te an inthlak deuh reng thei a, hliam dam hlim Lalduhsanga bakah Samson VL Chhanchhuaha leh Lalrinhlua te an ṭangkai hle bawk.
Hunthar coach Mawia chuan, "Ka naute kha mimal hmingṭhatna um lo turin ka hrilh a, inlungrual taka kan thawhho avangin kan champion thei a ni. Tun hun thleng tur hian kan bei nasa a, kan thawhrimna chu Pathianin mal a sawm," tiin Vanglaini a hrilh.
Player a nih laiin Mawia hi 2006 CYMA Volleyball Tournament-ah khan Best Player atan thlan a ni tawh a, coach a nih hnuah pawh a hlawhtling chho zel. Season hmasa khan a vawi khat nan an veng hi PVL-ah a champion pui a, tunah chuan a zawna nomawi chawi thei hmasa ber a ni leh ta.
An phu e
Tuichangral coach Eric Lalsangliana Pautu chuan chak phu zawkin hnehna an chan thu a sawi. Eric hian PVL season hmasa berah Electric Veng club Anastasia a champion pui thei a, tun hnai season hnih chhung chu Hunthar Veng a ngam lo thung.
Aizawl pawn aṭanga PVL khel hmasa ber Tuichangral hian
hna thil vangin Fabian Lallunghnema an chhawr thei lo a, a aiawhtu Joel Zodinsanga'n beisei a phak lo. 3rd MAP player hlui Joel hian ball a vaw thla hleithei lo a, setter Hmangaihthanga chuan ni danga a ball vawrh mawi leh hmuhnawm a lantir thei lo bawk.
Tuichangral hian an tawnhriat nei tam loh an tuar a, set khat hloh pawi zia an hre tawk lo niin a lang. Set hmasa berah point inhnaih taka an awm laiin Hosanna Lalawmpuia chuan a service out a, set hnihnaah pawh holam taka tihsual an ngah hle. Shivendra-a'n point 19 zet a paih chu an khingpui tana ṭhatpui tham a ni.
Eric-a chuan, "Team ṭha leh chak phu zawkin hnehna an chang, kan duhthusam thleng lo mah ila kan thlen chin hi a sangin kan lawm," a ti a, inkhel boruak sangah a naute tawnhriat neih tam loh leh Fabian-a tel lo chu an tuar nia a hriat thu a sawi tel bawk.