Intercontinental Cup a ropui dawn

All India Football Federation (AIFF) chuan June 1-10 chhungin ram pali inelna tur Intercontinental Cup khelh a ni dawn tih an tichiang a, India hmachhawn turin South Africa, New Zealand leh Chinese Taipei chu Mumbai khawpuiah an rawn zin dawn.

Mumbai Football Arena-ah inelna hi neih a ni dawn a, AFC Asian Cup 2019 khel tura inbuatsaih nan India chuan a hmang dawn a ni. AIFF chuan ram pathum rawn zin turte hian an first team an rawn tirh vek tur thu an sawi.

AIFF thusawi hi a dik a nih chuan India leilungah New Zealand player zingah Burnley player manto ber Chris Wood, West Ham defender Winston Reid, Heerenveen forward Marco Rojas, South Africa tan Portuguese club Braga forward Luther Singh, Ligue 1 club Montpellier midfielder Keagan Dolly, Chinese Taipei lamah Chinese Super League club Hangzhou Greentown tana khel Chen Po-liang, Beijing Enterprises player pahnih Wen Chih-hao leh Chen Hao-wei te ho kan hmu dawn tihna a ni.

Chinese Taipei hi Shanghai Shenxin FC boss hlui Gary White enkawlna hnuaia khel an ni a, South Africa hi England Under 19, Finland leh Helsingborgs IF manager hlui Stuart Baxter enkawlna hnuaiah khelin New Zealand hi Tottenham Hotspur assistant manager hlui Fritz Schmid enkawlna hnuaia khel an ni thung.