Spurs nomawi beiseina titawptu United

Manchester United-in Inrinni zan khan Tottenham Hotspur chu 2-1 in an lehthal a, Jose Mourinho hoten FA Cup final an lut. London club-in semifinal an luh hnuhnung pariatah chak an nei lo a, United erawhin Arsenal record nih rualin vawi 20 nan final an thleng.

Wembley Stadium-ah Spurs-in United hi 2-0 in league-ah an hneh tawh a, inkhel pawimawhah erawh Mourinho telna team an dang. Portuguese manager hian hun pawimawhah Mauricio Pochettino hote a hneh let a, May 19 hian nizana Chelsea leh Southampton inkhela chak zawk nen nomawi an inchuh ang.

An mualah Spurs?
Spurs-in tun season-ah Wembley Stadium chu home match khelh nan an hmang a, final luh inchuhnaah pawh mual hrechiang zawk tura ngaih an ni a, amaherawhchu FA Cup semifinal-ah league match angin ṭantu an ngah zawk tawk lo a, team pahnih hnenah ticket inzat pek an ni.

Poch-a hoten an nawr na nghal a, an phu anga goal hlawhchhuah nan minute 11 chiah an mamawh. Davinson Sanchez-a ball vawrhluh chuan United tlarhnung a ṭhiat a, ding lama awm Christian Eriksen chuan chang fuhin a ball cross duhthusam chu Dele Alli-a'n tleng chungin a tlawh lut a, Spanish keeper David de Gea tan dan rual a n lo.

Sum hman tamna
United-in nomawi duhin Alexis Sanchez an lalut a, Chilean forward lakluh nana sum an hman hnem avangin January transfer ngaihnawm ber zingah a tel pha a, amaherawhchu khelmualah Arsenal forward hlui hi a chet ṭhat zui loh avangin Mourinho-a'n thutlukna a siam suala ngaitu an tam hle.

Hun pawimawhah Alexis a rawn inlar a, minute 24-naah amah ang bawka sawisel hlawh Paul Pogba cross ball ṭha zet chu goal-ah a tauh lut a, United beiseina siamtu chauh ni loin Spurs phurna vaw chhetu a ni tel bawk.

Tottenham-in goal an chhuah hnuah inkhel an thunun thei tawh lo a, first half hma hreta Eric Dier-a goal ban pet per chu goal-ah a luh si loh avangin tho chhuak tur an awm tawh lo.

Midfield-ah Pogba a langsar a, Alexis pawh che ṭha zuiin minute 62-naah Chilean forward ball pek luh chu Lukaku-a'n a khawih per hnuah Ander Herrera chuan chakna goal ni turin box chhung chiah aṭangin a pet lut.

United-in hma an hruai hnuah Mourinho kaihhruai team an nihna a lang a, harsatna hranpa tawk tawh loin final an thlengah a ngaih theih a, Harry Kane-a telna Spurs goal bawh a na lo.

Nomawi tel lo
Tottenham-in tun hnaiah nasa takin hma an sawn a, amaherawhchu Poch-a hnuaia intuaitharna hian nomawi a keng tel rih lo. Argentine manager hian season li chhungin nomawi a chawi lo a, team dangin sum hmanga team an thuam ṭhat ve zel avangin an insiamṭhat ran a ṭul ang.

Season hnih chhung Premier League top scorer ni tawh Kane-a chu mamawh hunah dah ṭhatin a awm a, tun season-a che ṭha em em Son Heung-min pawh hun pawimawhah eng ruai a ni lo. London club hian FA Cup-ah chauh ni loin inelna dangah pawh nomawi chawi tur chuan inzir tur an nei tih a lang.

Spurs hian 1991 khan Nottingham Forest 2-1 a hnehin FA Cup-a an champion a, hemi hnu hi chu khawvela knockout inelna upa berah hian vawi riat zet semifinal an luh leh a, final thlengin loin an zuih ral vek.

Tottenham boss Mauricio Pochettino chuan, "Chak loh hrim hrim hi a na vek a, pawm a harsa a, final kan thleng thei lo hi pawi kan ti takzet a ni. Kan khingpui kan el tawk a, amaherawhchu chak turin kan che ṭha tawk lo. First half kan thunun a, United aiin kan ṭha zawk," tiin hun chanve lama an chungnunna chuan chakna a thlen phak loh thu a sawi.

Poch chuan sawi chhunzawm-in, "Khelmuala chet ṭhat chuan nomawi sawi mai chu a awlsam a, amaherawhchu Manchester United, Chelsea leh Manchester City te an awm chuan a awlsam lo. A pawimawh lai chu kan el tawk hi a ni," tiin a insawifiah.

Argentine manager hian a hman ṭhan Hugo Lloris aiah keeper atan Michel Vorm a luhtir a, an sawisel nasat phah hle.