Mohamed Salah record a tawk zo lo

Mohamed Salah chuan a season duhawm hman chhawm nung turin West Brom lakah goal khung mah se Liverpool hnehna a chanpui zo chuang lo a, Baggies nen hian 2-2 in an inhnehtawk.

Reds hian West Brom khelmualah minute 79-na thleng chu 2-0 in hma an hruai a, Danny Ings chuan minute lina lekah goal hmahruai khungin Salah chuan minute 72-naah a chhunzawm ve leh bawk.

Salah-a'n Liverpool goal hnihna a khung chiah hian tun season league-a goal 31-a khungna chiah a ni a, Premier League season khata match 38 khelh a nih hnua goal khung hnem ber record (31goals) Cristiano Ronaldo, Alan Shearer leh Luis Suarez ten an lo siam tawh chu a nihrual.

Mahse, Premier League player zinga season khata goal 40-a inrawlh thei pangana Salah (31 goals, nine assists) record-in Reds a chhan thei lo. Jake Livermore leh Salomon Rondon ten goal khung ve lehin 2-2 in an inhnehtawk.

Premier League mawngphaha awm West Brom dinhmun erawh a la him lo hle. Nizan inkhelah Swansea City-in Manchester City an hneh chuan an relegate ang. He thu buatsaih lai hian result kan hre hman lo.

Liverpool boss Jurgen Klopp chuan, "Half time lai khan Baggies hian an khelmual kha tuiin an phuh huh lo a, khelh a harsa a ni," a ti a, West Brom chu 'tactic' atana an khelmual enkawl ṭha loah a puh.

Klopp chuan, "Khatianga khelmual tih huh loh kha chuan danglamna tam tak a thlen thei. West Brom hian khelmual huh an mamawh lo a ni mai thei a, nakkumah Championship lamah an hmang chhunzawm aniang chu," a ti deuh kher!

Hetihlai hian Crystal Palace chuan khualmualah 0-0 in Watford an inhnehtawkpui a, league match thum chiah khelh hmabak tawh chungin he thu ziah lai hian table-ah 15-na an ni a, dinhmun him tia sawi tur an la ni lo.