Copa del Rey Sevilla ngamtu Barcelona an champion
Treble champion nih an beiseina thaiboin awm tawh mah se Barcelona-in double champion ni tur erawhin beiseina an la neih chhunzawm zel.
Catalan club hian Inrinni zan khan Copa del Rey final-ah Sevilla chu 5-0 ngawtin an sawp a, a zawna a vawi li nan Spanish Cup champion an ni. Barcelona hian La Liga champion ni turin league match nga khelh an la hmabakah point thum chiah an mamawh tawh bawk.
Atletico Madrid khelmual Wanda Metropolitano-a final inkhelah hian Luis Suarez chuan goal hnih a khung a, Lionel Messi, Andres Iniesta leh Philippe Coutinho te chuan goal khat ṭheuh an khung.
Barca dik tak
Barcelona-in Champions League quarterfinal first leg-ah 4-1 ngawtin AS Roma an sawp a, Italian club lakah tawlhthlu tura ngaih an ni lo. Mahse, Catalan club beiseina tichuai turin Roma hian 3-0 in Barca an hnehlet a, away goal rule hmangin semifinal an lut.
Khawvelin Roma result hi a mak an ti a, Barca an ngui. Mahse, Sevilla nena Copa del Rey final an khelh meuh chuan Barcelona-in an zia tak tak an chhuah leh tawh a, kawng tinrengah Sevilla hian an khan lo a ni ber.
Minute 14-na lekah Luis Suarez chuan goal hmahruai a khung nghal a, Coutinho siamsak niin Catalan club player che vel an hmuhnawm hle.
Messi mawina
Barcelona-in minute 14-na lekah goal hmahruai an khung a, an hawikir tawh lo. Messi chuan minute 31-naah an goal hnihna a khung a, Jordi Alba backheel aṭangin Argentine forward hian tun season-a a goal 40-na hi a khung.
Messi a chawl mai lo. Minute 40-naah Suarez tan a siamsak leh a, Uruguayan striker tan hna harsa a ni lo. Inkhel ṭantir lama bar pet pertu Iniesta-a'n an goal lina minute 52—naah a khung a, chak tur a chiang tawh.
Barcelona-in goal khung turin puitu an mamawh lo–mah se Manchester United nena sawizawm Clement Lenglet chuan an penalty area-ah a kutin ball a khawih fuh a, penalty chawiin Coutinho chuan a khung.
Sevilla ve thung
Sevilla-in Spanish Cup final-a Barcelona an hmachhawn hmain league-a an intum hnuhnung zawkah 2-2 in an inhnehtawkpui a, minute 88 hnu lama goal hnih khungtu Barca chu vannei zawk an ni.
Mahse, Copa del Rey final hmuhnawm tak beisei a nih laiin a hmuhnawm dan erawh a dang ta deuh a, Barcelona thiamna chu a hmuhnawmna awmchhun a ni a, final lut tura Atletico Madrid hnehtu Sevilla-in Barca an chelh lo.
Sevilla hian chance nei lo tawp erawh an ni bik lo. 1-0 chauh a nih laiin Joaquin Correa chuan yard 10 vel lek aṭangin a hun ṭha neih a chhawr lo a, Sandro Ramirez chuan keeper Jasper Cillessen chauh a hmachhawn chungin a pet goal thei lo bawk.
Mangṭha Iniesta?
Andres Iniesta-a'n Barcelona a chhuahsan dawn leh dawn loh chungchangah inrinsiak a awm reng a, Spanish midfielder hian, "Mipui hriatah tun kar chhung hian ka puang ang," tiin a hmalam hun chungchang a sawi a, Barcelona president Josep Maria Bartomeu chuan an player hian sawmtu a neih ngei thu a sawi bawk.
Kum 33 mi ni tawh mah se Iniesta hian thiamna leh theihna a la nei reng tih Sevilla lakah a lang chiang a, minute 88-naa lakchhuah a nih pawhin Sevilla leh Barcelona fan-ten ding chunga zahna lantirin an thlah.
Barcelona boss Ernesto Valverde chuan, "Iniesta-a'n a tih theih ang ti thei tur hian ka player nih lai khan ka kut hi ka hlan phal hial ang. Ani ang player kan nei thei hi ka lawm a, kan kianga a khel hi kan vai hian kan vannei takzet a ni," tiin a sawi.