Mi pawimawhten MFA Grassroots tlawh

Mikhail Gusav, Deputy Consul General, Russian Federation leh MLK Raja, OSD, Ministry of External Affairs-te chuan Inrinni khan Mizoram Football Association Grassroots training chu Lammualah an tlawh a, fuihna thu an sawi.

MFA hruaituten khualṭhate hi lo dawngsawngin an hna pawimawh kara MFA Grassroots an ngai pawimawh leh MFA chet velna an ngaihven chu lawmawm an tih thu an hrilh.

Mizorama lo zin mek Russian Deputy Consul General chuan, "He khelmualah ngei hian kum 30 kal ta khan Russia aṭangin team an lo kal tawh tih min hrilh a, chu khelmualah ngeia in inkhel ka en thei hi ka lawm hle a ni," a ti a, 1988-a Lammuala Russia aṭanga lo kal football team an lo kal tawh thu a sawi a; naupangte chu taima tak leh nuam ti taka football chu zir turin a chah.

MFA hruaitute nen an inkawmnaah Gusav chuan Russia sorkar kaltlanga football lama thawh dun theih dan a zawn tur thu a sawi a, a office kal tlanga tih theih awm angte a lo bawhzui tur thu a hrilh bawk.

Ministry of External Affairs-a OSD Raja chuan naupangte chu fuihin hlawhtling tur khawpa thawkrim turin a hrilh a, "Naupan lai aṭanga inkhelh zirna ṭha tak in nei hi in nihlawh tih inhria ula, a enkawltu MFA in nei hi in vannei hle a ni," tiin a sawi.