RCB chhandam nan ABD

23rd April, 2018

Royal Challengers Bangalore tan AB de Villiers chuan run 90 ngawt a vaw chhuak a, Delhi Daredevils lakah Bangalore club hi wicket rukin hnehna a chanpui.

Inrinni zan inkhelah hian Delhi an bat hmasa zawk a, rawn ding chhuak hmasa pahnih Jason Roy (5 runs) leh Gautam Gambhir (3) ten beisei an phak loh avangin an mualpho dawn niin a lang hman.

Mahse, Daredevils tan Shreyas Iyer (52 runs) leh Rishabh Pant (85) te pangngai taka an rawn bat tak avangin Delhi club-in target pangngai tak an rawn tuk a, over 20-ah run 174 siamin wicket nga an hloh.

RCB-in beisei an pha bik lo. Opener Quinton de Kock chuan run 18 chiah a siam tihin a out a, run hnih lek vaw chhuaktu Manan Vohra lah beidawn tizualtu a ni a, Virat Kohli-a'n run 30 rawn siam mah se ani ang 'class' aṭanga chhuak atan chuan a tlem mah mah bawk.

Delhi Daredevils hlim chhung erawh a rei lo. A hunah tak AB de Villiers a rawn pen chhuak a, South African batsman hian ball 39 lek a hmachhawnah run 90 a rawn vaw chhuak a, a tawp thleng damin over 18 lekah a team hi target a rawn umphak pui - wicket li chiah hloh bawkin an chak.

Inrinni zan inkhel dangah Kolkata Knight Riders leh Kings XI Punjab an inkhel a, ruahsurin a tihbuai inkhelah DL method hman niin Punjab club hi wicket kuain an chak.

KKR hian over 20-ah run 191 siamin wicket sarih an hloh a, Chris Lynn (74 runs) chu run siam hnem ber a ni. Kings XI bat hun a thleng a, bat laklawh laiin ruahsurin inkhel a tibuai.

DL method hmanga teh a nih hnuah over 13-ah run 125 an mamawh. Kings XI tan bat tui laklawh KL Rahul (60 runs) leh Chris Gayle (62, not out) an chet ṭhat avangin over 11.1-ah run 126 an tlin a, wicket khat chiah hlohin hnehna an chang.

Zirtawpni zan inkhelah Chennai Super Kings chuan run 64-in Rajasthan Royals an sawp bawk. CSK hi bat hmasa zawkin Shane Watson chuan century (106 runs) a vaw chhuak a, over 20-ah run 204 tlinin wicket nga an hloh.

Rajasthan Royals tan run 45 siamtu Ben Stokes bak che thei an awm meuh lo a, over 18.3-ah run 140 chiah siama wicket hloh vekin an tlawm ta a ni.