AC Milan an tlawm

Serie A table mawng­phaha awm Benevento chuan Pietro Iemmell goal khat hmangin AC Milan an hneh a, tun season chhungin league match bikah Benevento hi khualmuala an chak vawi khatna a ni.

San Siro-a inkhelah minute 29-naah Iemmello chuan goal awmchhun a khung a, hun tawp dawn­ah substitute Cheick Diabate chu hnawhchhuah niin, player 10 a khel tluan chungin point thum an hlawh chhuak. Tun season-a an intawn hmasak ṭumin an inhnehtawkpui tawh bawk a, tawnhriat nei ṭha Milan lakah kai thar team an tlangnel hle.

Amaherawhchu, Benevento hi chak mah se an him tihna a ni chuang lo. Nizan inkhelah Crotone chuan Udinese an hneh a nih chuan a vawi khat nana Serie A kheltu Benevento hi division hniamah an tla dawn tho.

Season thara European football khelh tum Milan tan an chak lo hi a pawi thui thei tawh. Gennaro Gattuso naute hian match 34 khelh aṭanga point 54 hmuin parukna an ni mek a, palina Lazio chu point 10-in an phak lo.

Milan manager Gat­tuso chuan, "Fan-te chung­ah ngaihdam ka dil, kan khelh ṭhat loh avangin point kan hmu lo a ni. Milan plyer khelh dan turin kan khel lo a, match lehpekah chuan a thleng nawn lo ang," a ti. Italian manager hian nipui bazar inhawn hunah player an lakluh tur thu a sawi bawk.

Inkhel dangah AS Roma chuan Spal chu si thum faiin an hneh thung. Roma tan hian Francesco Vicari, Radja Nainggolan leh Patrik Schick ten goal an khung a, table mawng lama talbuai Spal-in a chhanletna an nei lo thung.

Roma hian Thawh­lehni zanah Champions League semifinal khel turin Anfield an tlawh dawn. Liverpool an hma­chhawn dawn avang hian manager Eusebio Di Fran­cesco chuan player ṭha

ṭhen­khat a hahchawlhtir a, striker Edin Dzeko leh captain Daniele de Rossi te chu khelmual chhungah luhtir an ni lo.