Bayern Munich tan Lewy record

German player ni lo, ram dang player zingah Robert Lewandowski chu Bayern Munich tana goal khung hnem ber a ni ta. Lewy hian Hannover lakah goal khat khungin a club tan hian Bundesliga bikah goal 105 a khung tling chiah a, Claudio Pizarro (104 goals) khum­in Bundesliga-a foreign player goal khung hnem ber record thar a siam.

Inrinni zan inkhelah Bayern tan hian Thomas Muller-a'n goal hmahruai a khung bakah an goal hnuhnung ber khungtu Se­bastian Rudy tan a siamsak bawk. Muller a inlan karlakah hian Robert Lewandowski chuan goal khat a thawh ve bawk. Poland international Lewandowski hian tun season inelna hrang hrangah a club tan goal 39 a khung tawh.

Kum 29 mi Lewan­dowski chuan, "Season a la zo lo a, hnathawh hma­­bak kan la nei. Tunah chuan UCL kan ngaihtuah a hun, Euro­pean champion nih kan duh avangin team ṭha ber kan hneh a ngai a ni," tiin a sawi.

A zawna league match 11 chhung hnehna chang tawh Bayern Munich tan Hannover an hneh hi Real Madrid mikhual tura inbuatsaihna ṭha tak a ni nghal. Jupp Heyn­ckes-a naute hian Nilaini zanah Champions Lea­gue semifinal khel turin Spanish club lian an mikhual dawn a ni.

German manager Heyn­ckes-a'n Real an hma­­chhawn tur hre ran­in player a siksawi, Joshua Kimmich, Mats Hummels, Franck Ribery, Javi Marti­nez, Thomas Muller leh Lewandowski te chu bench-ah ṭhuttir an ni a, first half chhungin goal khung lo mah se player langsar an luh hnuah nuamsa takin hnehna an chang thei tho.

Inkhel dangah Hoffen­heim chuan Mark Uth-a goal hnih hmangin RB Leipzig chu 5-2 in an hneh a, point 49 hmuin table-ah pangnaah an invawrh chho - season tharah Europe-a inlan an beisei zel.

Hamburg pawhin inhamtan an la tum ve zel. Tla thei dinhmuna awm mek Hamburg hian playoff khel tur dinhmuna ding lai Freiburg chu goal khat faiin an hneh. Hertha Berlin, Stuttgart leh Borussia Dortmund te pawhin hnehna an chang ve bawk.