Chelsea-in FA Cup final an thleng Southampton ngamtu Giroud
Chelsea-in FA Cup final thleng turin Pathianni zan khan Southampton 2-0 in an hneh. Wembley Stadium-ah season liam taa Arsenal champion puitu Olivier Giroud chuan goal hmahruai a khung a, French striker thlaktu Alvaro Morata-a'n Blues goal hnihna a khung leh bawk.
London club hian May 19 khian Manchester United nen nomawi an inchuh dawn. Semifinal thleng pha chin aṭanga chhutin Blues leh Red Devils te inkhel tur hi 'dream final' tia chhal theih a ni a, manager pahnih Antonio Conte leh Jose Mourinho te inkar boruak ṭha lo mit tawha ngaih pawh a alh chho leh thei ang.
Chak tum Saints
Southampton manager Mark Hughes chuan Welsh manager zinga FA Cup champion hmasa ber nih tumin uluk takin player a rem a, tlarhnung a rem ṭhat avangin Chelsea-in first half-ah goal zawnah vawi hnih chiah an pet.
Kum 2003 hnua a vawi khat nan Saints-in final luh theihna remchang bawhpelh an tum lo a, amaherawhchu team ṭha lo zawk an nih miau avangin chetsual a thiang lo. First half-ah goal an chhuah lo a, an tumah an hlawhtling.
Gunners duh loh Giroud
Chelsea-in Arsenal duh loh Giroud chu tlarhma tih chak nan an lalut a, French striker hian beisei angin bul ṭan fuh zan lo mah se tunah chuan manto taka lakluh Morata aia thlan zawk a ni tawh.
Kar khat liam ta khan St Mary's Stadium-ah Blues-in goal hniha an hnufual hnuah Saints hi 3-2 in an lehthal a, hemi ṭum hian substitute Giroud-a'n goal hnih a khung.
Antonio Conte-a'n semifinal-ah Giroud-a bul ṭantirin second half ṭan chiaha Eden Hazard ball pek chu
Arsenal striker hlui hian Southampton player pahnih bum nan hmangin goal hmahruai a khung. Giroud-a goal a ropui a, Hazard-a'n a ball control hmangin a class sanzia a pholang ve bawk.
Giroud hian FA Cup vawi 26 a inlanah goal 22-ah a inrawlh a, January 2012 hnu lamah goal 15 khungin vawi sarih assist a nei a, record nei ṭha ber a ni. Sulhnu aṭanga thlir chuan Chelsea-in Gunners hnen aṭangin FA Cup-a player ṭha ber an chang fuh tihna a ni.
London club-in semifinal-ah Saints an pawt fuh kher bawk a, Giroud hian Southampton lamah hian goal riat a khung tawh a, England a pan hnua club pakhat lama a khung hnemna ber a ni bawk.
Kum 31 mi Giroud hi minute 10 khelh tur a la awm tihin lakchhuah a ni a, French striker thlaktu Morata chuan a luh aṭanga minute hnihna lekah Cesar Azpilicueta cross a tauh lut a, chak nemnghehna goal a ni.
FA Cup aia pawimawh?
Chelsea boss Antonio Conte chuan, "League lamah kan chetṭhat loh avangin final thlen hi a hlu lehzual. Amaherawhchu
tunah chuan ngaih pawimawh bik nei thei dinhmunah kan ding lo. Champions League khelh kan duh a nih chuan kan match hmabak paliah hian point thum kan hmuh vek a ṭul a ni. Tunah chuan league kan dah pawimawh leh tawh ang," tiin FA Cup bakah league-ah hna an an la ngah thu a sawi.
Blues hian tunah hian league match 34-ah point 63 an hmu a, an chunga awm Tottenham Hotspurs chu match li khelh tur la awmah point ngain an pha lo. Chelsea hian Spurs um phaka Champions League khel tura palina an nih theih a, FA Cup final-a Jose Mourinho kaihhruai United an hneh ngat a nih chuan kum hnih chhunga Antonio Conte-a'n England-a hun a hman danah hnualna tur a awm lo ang.