Rafael Nadal tan nomawi hlu bik

World number 1 Rafael Nadal chuan Kei Nishikori hnehin a vawi 11 nan Monte Carlo Masters nomawi a chawi a, tun hnai bikah a zawna a vawi thumna a ni bawk–Nadal hi world ranking chhuak tharah pawh number 1 a nih chhunzawm zel ang.

Pathianni zan final inkhelah Nadal hian darkar khat leh minute 34 chhungin 6-3, 6-2 in hnehna a chang. Clay court hmang thiam Nadal hian a inkhelh thiamna hmunah hian a zawnin set 36 a la tawh a, world number 36 Nishikori tan hun ṭha a siamsak ve eih lo.

Kum 31 mi Nadal hian tennis a khelh hun chhungin singles title 76 zet a la tling ta, Monte Carlo-ah hian champion lai a nih avangin nomawi humhim lo se la chuan Roger Federer-a'n world number 1 a nihna a luahlan ang. Mahse, Nadal hian season dang ang bawkin 'King of Clay' a nihna a lantir chho leh ta a ni.

Grand Slam vawi 16 champion tawh Nadal chuan, "Ka tan chuan he lai hmun hi a hlu a, season khat chhunga ka ngaihhlut leh inkhelh nuam ka tihna hmun pakhat a ni," tiin a sawi.

January thla a khelh zawh tak Australian Open-ah Nadal hi a inlan a, mahse hliam a tuar. A hliam vang hian Mexican Open, Indian Wells Masters leh Miami Open a khel thei lo zui a, tun thlatir khan Spain tan Davis Cup-ah inlanin an ram hi semifinal a hruai thleng.

Masters title 31 chawi tawh Nadal chuan, "Tun hnai thla nga chhung vel chu hliam vangin ka buai deuh reng a, tunah chuan harsatna nei loin ka inkhel ve leh thei ta," a ti. Nadal-a hneh tak Nishikori pawh a banrek hliam dam hlim a ni a, Japan tlangval tan final thlen phak hi result chhia a ni lo.