Premier League player-ah Salah a thiam ber

Mohamed Salah chu Professional Footballers' Association Player of the Year atan thlan a ni a, a player puiten Premier League player zingah ani aia thiam an hre lo.

Liverpool forward Salah hian he chawimawina dawng tur hian Manchester City player pawimawh Kevin de Bruyne, Leroy Sane leh David Silva bakah Manchester United goalkeeper David de Gea leh Tottenham Hotspur striker Harry Kane te a khum.

Manchester City champion-na kawnga thawhhlawk tak Sane-a'n Player of the Year chawimawina dawng thei lo mah se PFA Young Player of the Year-ah erawh thlan a ni tho a, amah hnaihtu langsar chu Harry Kane a ni.

Chawimawina ropui
Salah chuan PFA Player of the Year chawimawina a dawng thei chu a tan chawimawina ropui tak a nih thu sawi. Egyptian King tia hminglem an pek forward chuan, "Ka tan chuan chawimawina ropui tak a ni a, ka player puiten an thlanchhuah a nih avangin a lawmawm lehzual a ni," a ti.

Chelsea tana lo khel tawh player chuan sawi zawmin, "Chelsea-ah hun ṭha ka nei lo a, Premier League-ah hian lo kir lehin ka theihna tak tak ka pholang ang tih hi ka ring ṭhin. Vawiina in hmuh player hi chu Chelsea-a inhmuh ṭhin Salah nen kha chuan a danglam daih a ni," tiin a hlim hle.

Liverpool manager Jurgen Klopp chuan, "Salah enkawltu manager ka ni thei hi ka lawm a, chawimawina ropui tak a dawng a ni. Zinkawng hlimawm tak kan zawh mek a, mah se tunah hian chu chu a la tawp lo. Salah, i chawimawina nen chuan lo haw vat rawh. Thawhlehni zanah inkhel tur kan nei," a ti!

Sa la la la Salah
Liverpool tan Salah-a'n tun season-ah league-ah match 33 a khel tawh a, goal 31 ngawt a khung. Salah hi Premier League-a match 38 khelh a nih hnua season khata goal 31 khung thei player palina niin Cristiano Ronaldo, Alan Shearer leh Luis Suarez te hnung a zui.

Salah hian goal 31 a khung bakah assist vawi kua a nei a, shots 132 a neihah vawi 64 zet chu target-ah a pet. Vawi 684 ngawt pass dik neiin vawi 57 chance a siam thei a, AS Roma aṭanga Liverpool pantu sulhnu hi a ropui takzet.

England legend Alan Shearer chuan, "A khawih fuh apiang hi goal-ah a lut emaw tih mai tur a ni," a ti a, Gary Lineker chuan, "Mo Salah ka lawmpui takzet. A hmuhnawm a, goal a khung thei a, football mawina belhchhahtu a ni," tiin a fak ve bawk.

Hnai mah se a hla si...
Player of the Year chawimawina sem a nih hma hauhin Kevin de Bruyne chu Salah nena khaikhin hlawh ber a ni a, mah se Belgian international hian a tawpah chuan Liverpool forward a tluk ta lo.

De Bruyne hian tun season-a City

champion-na kawngah a thawhhlawk takzet – goal riat a khung a, assist 15 neiin Premier League player zinga assist ngah ber a ni a, chance siam hnem ber niin vawi 104 ngawt goal khungna chance a siam bawk.

Manchester City manager Pep Guardiola chuan, "Tun hnai thla kua emaw thla 10 chhung in thlir a nih chuan ani aia player ṭha an awm lo. Statistic ngawt kan en chuan ani aia ṭha tam tak an awm ang, mah se league match nga khelh tur la awm chunga a team champion puitu player thawhhhlawk bik chu an tam lo," a ti.

Kane khumtu Sane
Kum 22 mi Sane chu Young Player of the Year-ah thlan a ni a, he chawimawina dawng tur hian Spurs striker Kane, City tana a khelhpui Ederson leh Raheem Sterling, Manchester United forward Marcus

Rashford leh Championship Player of the Season atana thlan Fulham rawlthar Ryan Sessegnon te a khum.

Sane chuan, "He chawimawina ka dawng thei hi ka lawm takzet. Fans leh City tana ka khelhpuite chungah lawmthu ka sawi a, ka ṭhiante hian season tluana an khelh ṭhat avangin ka lawmpui em em bawk a ni," a ti.

Pathianni zana award semnaah hian hmeichhe pual award pawh sem a ni. Chelsea player pawimawh Fran Kirby chu Women's Player of the Year-ah thlan a ni a, Bristol City tana khel mek Lauren Hemp chu Women's Young Player of the Year-ah thlan a ni bawk.