Napoli tan Koulibaly goal a hlu

Serie A champion tur a la chiang lo. Napoli chuan Kalidou Koulibaly goal khat tauh luh hmangin hmahruaitu Juventus an luh chhuah. Pathianni zan inkhel result vang hian league nomawi inchuh boruak a nung thar hle.

Italian champion Juventus hi an chak lo avangin table-ah point khat chiahin hma an hruai tawh a, league match li khelh tur an la nei. A zawna season ruk champion tawh Juve hian kualmualah Inter Milan leh AS Roma te an la lenchilh dawn.

Goal hlu chu
Turin-a inkhelah mikhual Napoli lamin bul an ṭan fuhin inkhel an thunun zawk a, ball chang tam mah se goal khung theihna hun ṭha erawh an insiam thei mai bik lo. Goal lut loin an inhnehtawk mai dawna a lan hnuah, hun tawp hma chiahin Jose Maria Collehon-a corner pet chu Koulibaly-a'n a tauh lut - Napoli tan goal hlu bik leh beiseina siam thartu a ni.

Goal awmchhun khungtu Koulibaly chuan, "Tu hnaiah kan phur tharin boruak a ṭha em em a, fan-te puihna kan dawng ṭha hle. Juve kha team ṭha tak an ni a, mahse keini pawhin nomawi chuh turin kan bei thei tih kan lantir a ni," a ti.

Senegalese defender Kouli­baly chuan sawi chhunzawmin, "Chhiarkawp dana a theih chhung chuan league nomawi kan beiseina a tawp ngai lo a, chu kan beiseina a la nun zia chu kan lantir a ni. Player tin kan thawkrimin kan khel ṭha vek," tiin a sawi.

Juve an tlawm
Juventus-in an khelmual an hmangthiam ṭhin hle, kumin chhungin league match ruk an khelh tawhah hnehna an chang vek a, goal 18 khungin an lamah goal khat chiah a lut. Turin club fan-te chuan, "Kan khelmual a ni a, Napoli hian 0000% bak chak theihna chance an nei lo," tih chu an mikhual team an lo chhawn dan a ni.

Amaherawh­chu, beisei leh duh angin thil a kal vek bik lo. Mas­similiano Allegri nauten beisei an phak lo a, an match hnuhnung bera a hahchawlhtir Pablo Dybala chu Gonzalo Higuain thlawp turin luhtir nghal ni mah se an hriam tawk lo. Minute 90 chhungin Juve hian goal zawnah pet an nei lo a, first half-a Miralem Pjanic-a freekick an khawih perin crossbar a per ti bak chu sawi zui tur an ngah lo.

Italian manager Allegri chuan, "Kan inven fimkhur tawk loh vangin goal kan chhuah a, insiamṭhatna hun a awm tawh loh avangin kan tuar. Tunah chuan Inrinnia Inter nen kan inkhelh tur hi a pawimawh zual tawh dawn hle, a rang thei ang bera indinthar leh nghal kan ngai," a ti. Juve hian league bakah Coppa Italia final khelh tur an la nei a, May 10-ah AC Milan nen nomawi an inchuh dawn bawk.