USA hmachhawn tur Czech Republic

Fed Cup khel tur a chiang ta. Champion lai United States leh Germany hnehtu Czech Republic ten November 10-11 chhungin nomawi an inchuh ang.

Tunkar tawp khan semifinal hnuhnung zawk khelh niin, Czech Republic hian an khingpui Germany 4-1 in an hneh a, inkhel pawimawh takah Petra Kvitova chuan minute 58 chhung lekin Angelique Kerber lakah 6-2, 6-2 in hnehna a chang.

Wimbledon champion Kvitova chuan, "A nih­na takah chuan kan inkhelh hma kha chuan ka hlauthawng ve deuh. Ram tan a nih tawh chuan tupawh kan ṭang zual em em a, tawnhriat ngah Kerber laka hnehna ka chang kha chu ka vannei a ni," tiin world number 1 hlui a hneh chungchang a sawi.

Semifinal inkhel pakhat zawkah US chuan France 3-2 in an hneh bawk. Ram pahnihte 2-2 a an inhnehtawk hnuah Sloane Stephens chuan 6-2, 6-0 in Kristina Mla­denovic a hneh leh a ni.

Fed Cup hi ram leh ram hmeichhe tennis team hmanga inelna a ni a, best of five series hmangin chak zawk zawk zawn a ni ṭhin. Hmeichhe inelna ang chiah hi mipa tan a awm bawk a, khelh dan phung inang mah se Davis Cup tih a ni thung.