Austin-ah Marquez a chak ber

Pathianni zanlai khan Austin GP tlan a ni a, MotoGP champion lai Marc Marquez chuan hnehna changin championship lamah a dinhmun a siamṭha ve leh ta - Austin bikah hian a zawnin vawi ruk hnehna a channa chiah a ni.

Circuit of the Americas-a intlansiakah Marquez hian lap 25 chu minute 41 leh second 52.002 chhungin a thleng a, a hnungah hian season hmasa tir lama che ṭha tak Maverick Vinales a thleng bawk.

Tun hnaiah Marquez-a'n chanchin ngaihnawm lo a nei zauh zauh. Intlansiak hnuhnung berah Valentino Rossi laka a chetdan mawi lo vangin hrem a ni a, Austin GP-ah pawh qualifying lamah a tlan ṭha viau nachungin, Vinales a dan avangin pole position aṭanga bul ṭan tur ni mah se palina aṭanga tlan ṭantir a ni.

Honda rider Marquez hian theihna a nei sang a, intlansiakna takah pawh dan theih a ni chuang lo. Amaherawhchu, bike intlansiakna sang berah hian rider dang tana hnawksaka a che chhunzawm zel a nih chuan mipui ngainat a hlawh lo zel ang tih a rin theih.

Austin-ah championship hmahruaitu Andrea Dovizioso chu panganaah a thleng a, Ducati rider hian point 46 hmuin a chung berah la awm mah se amah hnaih bertu Marquez nen an inkarah point khat chiah a awm tawh.

Austin GP Results
# Rider Team

1 Marc Marquez Honda

2 Maverick Vinales Yamaha

3 Andrea Iannone Suzuki

4 Valentino Rossi Yamaha

5 Andrea Dovizioso Ducati

6 Johann Zarco Tech3 Yamaha

7 Dani Pedrosa Honda

8 Tito Rabat Avintia Ducati

9 Jack Miller Pramac Ducati

10 Aleix Espargaro Aprilia

Riders' standings

# Rider Points

1 Andrea Dovizioso 46

2 Marc Marquez 45

3 Maverick Vinales 41

4 Cal Crutchlow 38

5 Johann Zarco 38

6 Andrea Iannone 31

7 Valentino Rossi 29

8 Jack Miller 26

9 Tito Rabat 22

10 Danilo Petrucci 21