CSK leh Rajasthan an chak

Indian Premier League khelh mekah Pathianni zan khan Chennai Super Kings leh Rajasthan Royals chuan an khingpui ve ve lakah hnehna an chang. CSK hi Sunrisersh Hyderabad lakah run liin an chak hram a, Rajasthan hian wicket thumin Mumbai Indians an hneh thung.

Pathianni zan inkhel hmasa zawkah CSK an bat hmasa a, over 20-ah run 182 siamin wicket thum chauh an hloh. Chennai club tana run siam hnem ber Ambati Rayudu chuan run 79 a vaw chhuak a, run 54 siamtu Suresh Raina chuan a pui ṭha viau bawk.

Sunrisers Hyderbad-in run siam loin opener Ricky Bhui chan nghal mah se captain Kane Williamson chuan run 84 a rawn siam avangin beiseina an nei hman a, Yusuf Pathan chuan run 45-in a rawn zui.

Mahse, SHR-in CSK bowler Deepak Chahar an ngam lo - over li lek a vawmah run 15 chiah a pe a, wicket thum ngawt a la. Hyderabad-in an tlin chu run 178 a ni a, wicket wicket ruk hlohin a vanduai zawkah an ṭang ta a ni.

Nizan inkhel hnuhnung zawkah Mumbai Indians tan opener Suryakumar Yadav a chet ṭhat nghal avang­in Mumbai club hi chak tura rinkai nghal an ni - Suryakumar hian run 72 a siam a, run 58 siamtu Ishan Kishan hming lam hmaih a thiang lo.

Mumbai club-in over 20-a run an siam zat chu 167 a ni a, wicket sarih an hloh.

Rajasthan Royals bat hun a thleng a, Mumbai Indians angin che ṭha fala sawi tur awm lo mah se over 19.4-ah an target an umpha a, wicket sarih vek hloh chungin hnehna an channa zat chu wicket thum a ni.

Rajasthan club tan hian Sanju Samson (52 runs) chu run vaw chhuak hnem ber a ni a, Ben Stokes (40) leh Krishnappa Gowtham (33, not out) ten pangngai takin an bat bawk.