Roma hmachhawn turin Liverpool an inpeih

Champions League-a English club champion ngun ber chu Liverpool an ni a, he nomawi hi vawi nga ngawt an chawi tawh. Mahse, Europe-a Liverpool ropuina sawi a nih dawn apiangin thawnthu hlui sawi a ngai ṭhin a, an champion hnuhnung ber hi 2005 daih kha a ni tawh.

Liverpool-in tun season-ah an nomawi hunna 'Champions League nomawi' dang hmanga tih mawi belh turin hun duhawm an nei a, zanin dar 12:15 hian Champions League semifinal first leg-ah Rome khawpui inchhuanna AS Roma an hmachhawn dawn.

2007-08 season hnua a vawi khat nana Champions League semifinal khel tur Liverpool khawpui an phur tawh a, fans tam takin an ropui ṭhinna kha neihlet beiseiin he hun hi nghakhlel takin an thlir. Reds manager Jurgen Klopp chuan, "Roma hmachhawn turin kan inpeih tawh," a ti.

Klopp-a urhsun
Liverpool-in Champions League semifinal lut turin Premier League champion Manchester City chu inkhel pahnih belhkhawmah 5-1 in an sawp thei a, he team hian AS Roma hneh turin theihna an nei ṭha tawk tihah inhnialna tur a awm lo.

Mahse, he Liverpool team vek hi kartawp league match-a Premier League mawngphah team West Brom 2-2 a inhnehtawkpuitu an ni a, Merseyside club hi hman ang thoin hriatthiam an la harsa reng.

Liverpool boss Jurgen Klopp-a'n Baggies an inhnehtawkpui chhanah khelmual ro lutuk vang tiin puh mah se a naute khelh danah lawm lohna tur a awm tih a hria a, Pathianni khan Roma an hmachhawn tur atana inbuatsaihna a bik taka nei turin coaching staff a ko khawm.

A chhanna chu...
Klopp-a'n coach ho a koh khawm hnuah, "Rome khawpui tana Champions League hlutzia hi kan naute kan hrilhfiah a ngai. Baggies laka kan khel ṭha lo chungin Roma hmachhawn tur erawhin kan inpeih tawh a ni," tih chu a thusawi a ni.

German coach thusawi aṭanga teh tur a nih chuan Liverpool hian Roma hneh theih dan tur an duang chhuak tawh niin a lang. Chutihruala hriat tel sak atana ṭha chu Roma hi quarterfinal aṭanga Barcelona hnawt chhuaktu an ni.

Nou Camp-ah 4-1 ngawtin tlawm mah se Roma hian anmahni khelmualah huaisenzia chhuahin Barca chu 3-0 ngawtin an lo sawp a, away goal rule hmangin an tlang daih. Thawnthu hlui thlir tel chuan Liverpool tan chak ringawt a tawk lo tih a hriat a, Jurgen Klopp enkawlna hnuaia goal 300 chuang khung tawh team hi goal tam tak nena chak an tum a ṭul ang.

Engtia dan tur nge?
Liverpool tana zawhna pawimawh tak chu, "Roma hi engtia dan tur nge ni ang?" tih hi a ni a, Klopp-a'n a chhanna nei tawh niin a insawi a, engtinnge goal tam tak an sur tir theih ang? tih hi zawhna pawimawh dang chu a ni.

Goal khung lamah chuan Liverpool hian Mohamed Salah, Roberto Firmino leh Sadio Mane an neih avangin lungngaihna tur a awm lo a, chutihrualin an goal nawr na tak kara goal chhuah tel an ching hi a pawi lai chu a ni.

Roma-in Nou Camp-a goal khat an khung khan 4-1 a nihna chauh a ni a, scoreline timawitu ang chauha chhal theih a ni. Mahse, Italy-a an inkhelh leh meuh chuan away goal hlu takah a chang a, Roma-in away goal hlutzia an hriat tawh avangin Anfield-ah tha thlah loin an khel dawn tih a chiang.