Five star Manchester City

Premier League champion nichungin Manchester City-in Pathianni zan khan Etihad Stadium an lut a, Swansea lakah 5-0 a hnehna changin champion an phu zia an lantir bakah tun hmaa champion tawhte nen bawm khata dah pawha lang nalh tur khawpin khelmualah an chevel a hmuhnawm.

City tan hian first half-ah David Silva (12') leh Raheem Sterling (16') ten goal an khung a, minute 54-naah Kevin de Bruyne-a'n yard 25-na aṭangin goal mawi a khung.

Gabriel Jesus-a'n minute 64-naah penalty chu goal-ah chantir thei lo mah se a per chu Bernado Silva-a'n a pet goal tho a. Brazilian forward Jesus hian minute 88-naah Yaya Toure siam sak chu tauh lut leh thoin City-in an champion hnua an match hmasa berah goal ngain an chak.

Khawvel pawn team
Swansea boss Carlos Carvalhal chuan, "Etihad Stadium-ah ah Manchester United chiah an la hneh lo a, kan tan chuan a harsa. Champion team an ni a, khawvel pawn team ang mai an ni," tiin uar takin a khingpui a fak.

Swans hi tla thei dinhmunah an ding a, tunah hian 17-naah an awm mek. Carvalhal chuan, "Him tumin kan khelh a ngai a, kan hnuai chiaha awm nen point liin kan la inthlau. Tunah chuan tuna kan inkhel hi kan theihnghilh a, kan khelh leh tura rim zawkin point hlawh chhuak ngei turin kan ṭan a ṭul a ni," tiin Premier League-a inhamtan ngei an tum thu a sawi tel bawk.

Tunah chuan record!
City manager Pep Guardiola chuan, "League nomawi chu kan kutah a awm ta a, kan hmabak chu record a ni. Football-ah chuan tawp chin a awm lo a, hmasawn zel a ṭul. Kan tihtur kan zo tawha kan ngai a nih chuan hmalam kan pan thei lo ang, chutihrualin kan insiamṭha zel a nih chuan season thar atan a ṭha dawn," tiin tih mai mai an tum lo.

Manchester City hian League Cup an champion tawh a, Champions League leh FA Cup-ah beisei tur an nei tawh loh avangin league chiah khelh tur an nei tawh. April 29 hian West Ham an tlawh ang a, chumi zawhah Huddersfield leh Brighton & Hove Albion an mikhual leh ang a, season khar nan Southampton an tlawh ang.