Zaninah Europa League final rematch Manchester United vs Villarreal
Zanin dar 12:30 hian Old Trafford-ah Europa League final rematch a ni dawn a, Manchester United-in Spanish club Villarreal an mikhual dawn. Ole Gunnar Solskjaer hote hian Champions League match hmasa berah Young Boys an hneh lo a, Yellow Submarine hi Atalanta ten an inhnehtawk thung.
Group E inkhel dangah Atalanta-in Young Boys an mikhual dawn. Season liam ta khan Serie A club hian last 16 an thleng a, Man United-in knockout stage an thleng pha lo. Europa League champion leh Swiss champion ten Champions League an khel pha lo hrim hrim.
Final kha
Gdansk, Poland-ah May 26, 2021 khan Europa League final hi khelh a ni a, Villarreal tan an vawi khat final thlenna a nih laiin Manchester United erawh kum 2017 khan an champion tawh thung. Final hmuhnawm takah Yellow Submarine-in Gerard Moreno hmangin minute 29-naah an khung hmasa a, Manchester United-in minute 55-naah Edinson Cavani hmangin an sut.
Hun pangngaiah 1-1 in an inhnehtawk a, penalty hmangin chak zawk zawn niin Spanish club hi 11-10 in an chak. Khelmuala player awm zawng zawngin penalty an pet vek a, pet goal lo awmchhun chu David de Gea chauh a ni. Villarreal-in nomawi an chawi theih bakah Champions League an khelh theih phah bawk. Man United erawh Solskjaer-a hnuaia final an luh hmasak berah nomawi an la chawi lo.
Danglam tam lo
Manchester United-in Spanish club aiin nipui bazar an hmang ṭha zawk. Old Trafford-ah club legend Cristiano Ronaldo an lak let bakah Real Madrid aṭangin Raphael Varane an lalut a, nikum nipui bazara an lakluh theih loh Jadon Sancho chu Borussia Dortmund aṭangin an lei chhuak tawh bawk.
Europa League final-ah khan Harry Maguire chu inhliam vangin a khel thei lo a, tun ṭumah pawh hian Man United captain bakah Luke Shaw (hliam) leh Aaron Wan Bissaka (hrem) vangin tlarhnung siksawi a ṭul. Maguire a inlan thei lo a nih chuan Varane leh Victor Lindelof te an awm a, Shaw leh Wan Bissaka te aiah Alex Telles leh Diogo Dalot te an lut thei bawk ang.
Midfield lam erawh Sancho-a'n a theihna ang a la lantir theih loh avangin bul a ṭan a rinawm lo a, McFred tiha an sawi mai Scott McTominay leh Fred te chu an inkawp a rinawm. Chutihrualin tlarhmaah erawh Ronaldo a awm dawn a, Champions League-a goal khung thei ber Portuguese forward thlawp tur hian Paul Pogba, Bruno Fernandes leh Mason Greenwood te an awm thei ang. Transfer laiin Man United-in pound maktaduai 100 seng tling mah se tun dinhmunah kher chuan Europa League final aia an ṭhat sawtna a awm a nih pawhin a tam kher lo ang.
Moreno Out?
Villarreal pawhin final-a an hmachhuan ber Moreno chu malpui hliam vangin Real Madrid nen an inhnehtawk ṭumin squad-ah a awm lo, tun ṭumah pawh a dinhmun a chiang lo. Winger ball thiam Samuel Chukwueze hliam vangin a khel thei dawn lo a, nipui bazarah Carlos Bacca an chhuahtir tawh bawk.
Yellow Submarine tlarhmaah Paco Alcacer, kum 18 mi club academy chhuak Yeremi Pino leh Bornemouth aṭanga an lakluh Arnaut Danjuma te an la awm. Hming langsar ber kum 28 mi Alcacer hian Champions League-ah goal hnih chiah a la khung.
Midfield leh tlarhnung erawh final ang tho a la ni thei dawn. Mual laiah Dani Parejo, Etienne Capoue leh Manu Trigueros te an la awm thei a, tlarhnungah captain Raul Albiol leh Pau Torres te an inkawp theih bakah mual sirah Juan Foyth leh Alberto Moreno te an awm thei. Goalkeeper-ah nomawi chawipuitu Geronimo Rulli a la awm bawk a, Old Trafford-ah point an hlawh chhuak dawn a nih chuan an tlarhnung hi an pawimawh ang.
Engtin zel?
Squad en mai chuan Man United hi chak zawk tur a ni a, amaherawhchu tun season-a Solskjaer-a hote khelh dan aṭangin player aṭanga teh chi a ni lo tih a hriat tawh. English club hian match hnuhnung paliah vawi thum an chak lo a, an hneh lohte hi Young Boys, West Ham leh Aston Villa te an ni.
Hammers leh Villa an hneh lohna hmun hi Old Trafford a ni a, helai hmun tho hi zanina Villarreal an mikhualna hmun tur a ni. Yellow Submarine hian kar liam ta khan Santiago Bernabeu-ah point an hlawh chhuak thei a, Real Madrid lakah goal an chhuah lo. Villa laka goal khung thei lo Man United tan tlarhma insiamṭhat a ṭul hle.
Chutihrualin tlarhma ai mahin Man United midfield-in sawisel a hlawh a, khawtlang media-te chuan mipui ngaihven a ni tih hriain English midfielder Declan Rice leh Kalvin Phillips te pahniha pakhat zawk chu Old Trafford-a lakluh an tum tih thawm a awm.
Zaninah atan erawh transfer thuthang hian ṭangkaina a nei lo a, Norwegian manager Solskjaer-a'n Man United hna chelh zel turin chak a mamawh. League Cup-ah Man United an tla tawh a, Premier League-ah an che ṭha tawk lo a, Champions League lehzela an chesual a nih chuan Solskjaer hian ban a hlat lo ang. Point la hmu lo Man United-in pressure an ngah a, zanina Spanish club nen an inkhel tur hi a hmuhnawm ang.