Brandon-a'n Mohammedan final a luhpui

Asia rama football inelna upa ber Durand Cup-ah Mizo tlangval Brandon VL Remdika goal hmangin Mohammedan SC-in final an lut. Thawhṭanni zan semifinal hmuhnawm takah Brandon-a'n goal pawimawh bik a khung a, Kolkata club hian extra time-ah Bengaluru United 4-2 in an hneh.

Salt Lake Stadium-a inkhelah hun pangngaiah Mohammedan tan Marcus Joseph leh Faisal Ali ten an khung a, Bengaluru tan Pedro Manzi leh Kinshuk Debnath ten an khung. Extra time-ah Hunthar tlangval Brandon-a'n chakna goal a khung a, Nikolo Stojanovic-a'n chak nemnghehna goal a khung leh bawk.

Mizo tamna Mohammedan
Durand Cup hi kum 1888-a khelh ṭan tawh a ni a, kum 133-a upa ni tawhin tun ṭum hi vawi 130-na a ni tawh. Champion lai chu Gokulam Kerala niin kum 2019 khan final-ah Mohun Bagan an hneh a, Covid-19 vanga kum 2000-a inelna neih a nih loh hnuah kuminah neih leh a ni.

Mohammedan hian group stage-ah Bengaluru United hi 2-0 in an hneh lo a, chutihrualin inkhel an thunun tho avangin semifinal-ah hian rinkai zawk tiha sawi tur an awm lo.

Kolkata club-ah hian Mizo panga keeper Zothanmawia (T. Mawia), defender pahnih Lalramchullova leh Lalramhmunmawia (Tea), midfielder Malsawmzuala bakah forward Brandon-a te an awm. Final-ah hian T. Mawia leh Chullova ten inkhel bul an ṭan.

Inkhel hmuhnawm
Salt Lake Stadium-ah mipui 25,000 vel an pung khawm a, inkhel boruak pawh a nung ṭha. Ṭan chiahah Spanish forward Pedro Manzi chuan mawi zetin goal ban perin a pet lut a, Bengaluru-in 1-0 in hma an hruai nghal.

Mohammedan-in minute riatnaah siphurh an sut ve nghal a, Trinidad and Tobago international striker Marcus Joseph chuan player pathumin an veng chungin goal ṭha zet a khung.

Mual neitu an che ṭha zui a, Joseph-a pass chu Bengali rawlthar Faisal Ali-a'n goal-ah a chantir. Team pahnih a inhnehtawk a, Bengaluru tan Kinshuk Debnath-a'n kawh zetin a hlap lut a, hun pangngaiah 2-2 a ni.

Hun tawp hma deuh hian Manzi-a'n a kut hmanga chum goal tum a, referee Harish Kundu-a'n Spanish forward chet dan hi a hmuh chian avangin yellow card vawi hnihna a pe a, a hnawt chhuak nghal.

Mohammedan-in extra time-ah an tamna an hmang ṭangkai a, substitute Brandon-a'n a thiamthil a lantir. Mizo tlangval hian box chhungah ball a lalut a, minute 104-naah player pahnih venna kar aṭangin goal kilah a pet lut.

Brandon-a goal vangin Mohammedan dinhmun a ṭha a, minute 109-naah penalty hmuin Nikolo-a'n goal-ah a chantirin Kolkata club hi 4-2 in an chak.

Engtin zel?
Goal pawimawh khungtu Brandon-a chuan, "Ka luh hma chiah khan Bengaluru khan an siphurh an sut a, thinrim deuh sa ṭung khan ka lut. Pet goal turin rilru ka siam a, ka rin ai tak chuan pet goal ṭha. Goal pawimawh a ni a, Salt Lake-ah kher a ni bawk nen ka lawm hle," tiin Vanglaini a hrilh.

Brandon-a hian Salt Lake-ah hian ṭum hnih goal a khungna a ni a, East Bengal tana khelh laiin Gokulam Kerala tan a khung tawh bawk. Mohammedan defender pawimawh Chullova chuan, "Final thlen hi chu a nuam a, nomawi chawi erawh ISL club kan hmachhawn dawn avangin a harsa dawn. Mizo ti hmingṭha turin theihtawpin kan khel ang," tiin a sawi ve bawk.

Final hi October 3, Pathianni zan dar 6:00-ah khelh a ni dawn. Mohammedan hian zanin dar 6:00-a FC Goa leh Bengaluru inkhela chak zawk an hmachhawn ang. ISL club Goal hian team ṭha hruaiin group match aṭangin an la chak vek a, Bengaluru erawh group match-ah Delhi FC nen an inhnehtawk.