Daniel Ek-a'n Arsenal a la beisei

Spotify neitu Daniel Ek chuan engtik niah emaw chuan Arsenal lei theih ngei a la in beisei. North London Derby khan a hmunah Daniel-a leh Thierry Henry ten an en dun a, an club ṭan chak lai hi hlim takin an lo lawm.

April thla khan Daniel Ek hian Gunners lei tumin hma a la, a lei tumna zat hi chiang taka tarlan ni lo mah se pound tluklehdingawm 1.8 vel nia sawi a ni a, a club ṭan tak neih a duh avangin a hausakna nena chhutin a sum hman phal hi a tam hle.

Mahse, Arsenal neitu Stan Kroenke chhungkua chuan sum an mamawh loh thu an sawi thung a, club lei dilna an dawn loh thu leh dawng tehreng pawh ni se an ngaihven loh tur thu an sawi bawk.

Henry chuan, "Indawrna nei tur chuan a lehlamin an ngaihthlak duh a ngai, tun dinhmunah chuan inbiakna a awm tawh rih lo. Thil theih loh a ni lo a, amaherawhchu hun rei tak buaipui tur chi a nih avangin dawhthei taka nghah a ngai," tiin a sawi.

Kum 38 mi Daniel hi Arsenal ṭantu ruhkawl a ni a, club lei a tum chungchangah pawh hian fans lamin an ngainat player ṭhate chu thawhpuiah a sawm hmiah - a sawm zingah hian Henry pawh a tel.

Arsenal ṭantu tam tak chu club neitu lakah an lungawi lo a, player lei nana sum theh chhuak tam tawk loa an ngaih bakah, manager hlawh leh club inrelbawl nan sum an ren uchuak niah an ngai, bang tura nawrna pawh a lian hle.

Mahse, nipui bazarah Gunners hi Premier League club zinga sum hmang hnem ber an ni a, season tirah result ṭha lo mah se tun hnaiah an chet ṭhat leh tak avangin a neitu lam bang tura nawrna thawm pawh a reh ta deuh, boruak ṭha hian eng chen nge a daih ang tih erawh hriat a ni lo.

North London club hi an league match hnuhnung pathumah an chak. October 2, Inrinni zanah season hmang ṭha tak Brighton hmachhawn turin Falmer Stadium-ah an leng lut leh ang.