Italy-ah Romelu Lukaku a kir dawn

"Kan khingpuite chu tute nge an nih a pawimawh ber lo, kan duh ang takin kan khel chhuak em tih hi a pawimawh zawk chu a ni," tiin Chelsea manager Thomas Tuchel chuan a sawi a, team ṭha hmachhawn a hlau lem lo.

Champions League champion lai Chelsea hian zanin dar 12:30 hian Juventus an lenchilh dawn. Team pahnih hi group H hmahruaitu nih inchuh tur an ni dawn a, last 16 thlenga an khingpui tur hril thei a nih avangin an inkhel hi a pawimawh dawn.

Blues leh Old Lady hi UCL bikah vawi nga an inhmachhawnna tur chiah a ni, tun hmain ṭum khat ve ve an inhnehtawk a, vawi hnih dang chu an inhnehtawk thung - team pakhat zawk chuan sulhnu ṭha an hnutchhiah ngei a rinawm.

Season hmasa khan Romelu Lukaku-a'n Inter Milan chu Serie A nomawi a chawi pui, league champion an nih theih nan hian Juventus meuh pawh an ngam. Ngampa taka a tal tawhna hmunah a kir leh dawn a, mipui enbik a ni ang.

Goal a ngai
Thomas Tuchel-a'n Manchester City laka a naute khelh dan a duhkhawp lo a, striker palian leh tharum ngah Romelu Lukaku chu a duh angin an chhawr ṭangkai tawk lo niah a ngai a; zaninah chuan Belgian striker hian ball a hmuh tam deuh a rinawm.

Man City an hneh loh ṭumin hliam tenau vangin Mason Mount an chhawr thei lo a, season hmasa UCL final-a goal awmchhun khungtu Kai Havertz chu bench-ah dahin - N'Golo Kante, Mateo Kovacic leh Jorginho te an inkawp.

Tuchel-a'n goal khung a duh a nih chuan a midfield a siksawi ngeiin a rinawm. Chelsea fa chuam Mount a la fit tawk lo a nih pawhin Havertz a rintlak, German international hian Lukaku a thlawp thei a nih chuan Juve tlarhnung tan ven an harsa ang.

Kum 28 mi Lukaku hi goal khung thei tak a ni, mahse club lian lakah a nawi leh ṭhin tih chu amah duh lotute sawiselna a ni fo. Blues tan league match nga aṭanga goal thum khungtu hian amah ringhleltute chhanlet nan Allianz Stadium-ah goal khung ngei a tum dawn.

James a hliam
Tuchel-a hman thiam tak Reece James chu Jack Grealish nen ball an inchuhna lamah a hliam a, a khel zui thei lo. English defender hian goal venhim bakah a nawr kawngah a thawh hlawk ṭhin, ani awm lo tur hi channa lian tak a ni ang.

Mahse, Blues hian tawnhriat ngah Thiago Silva an nei. Silva, Cesar Azpilicueta, Antonio Rudiger, Andreas Christensen leh Marcos Alonso te an la awm avangin a duh angin tlarhnung a la rem thei dawn tho, a player neih dan chhut chuan pali an intlar a rinawm.

Chelsea tana thu lawmawm chu Edouard Mendy a dam leh tawh. UCL best keeper ni lai hian Man City lakah goal chhuah mah se a khel chhe lo, an khingpui goal khung tur vawi li ngawt a dansak - zaninah pawh fans lamin an thlamuanpui leh ang.

Manager Tuchel-a'n goal khung an mamawh thu sawi mah se, season hmasa ang bawk khan hlawhtlinna chang tur chuan an hnung lam remphui a ngai; Juve mualah pawh goal tam zawk khung ai chuan mahni goal ven an ngaih pawimawh a rinawm.

Dybala leh Morata
Paulo Dybala leh Alvaro Morata te chuan Chelsea an hmachhawn thei dawn lo. Juventus tan an hmatawng pahnih inhliam hi chanchin ṭha lo a nih laiin, an khingpui tur Blues tlarhnung tan erawh thawk huaina tham a ni.

Sampdoria laka goal a khung hnu lawkah Dybala hi malpui hliam vanga lak chhuah a ni, bench aṭanga lut Morata pawh hun tawp hma minute riat chauh awm tawhah thlak a ngai - an chawlh chen tur a chiang lo.

Juve manager Massimiliano Allegri chuan, "Chelsea an hmachhawn thei lo ang, kar tawpa Torino nen kan inkhelh hunah pawh an inlan thei dawn lo," tiin a player pahnih chungchang a sawi a, international break zawh hunah chuan an lo kir a beiseiawm.

Cristiano Ronaldo chhuah hnuah Dybala mawhphurhna a sang zual a, Argentine forward awm lo ringawt pawh buaina a tlin laia Morata awm lo lehzel hian Allegri lu a ti hai viau ang; midfielder Adrien Rabiot chu mimal thil vangin a dinhmun a chiang lo bawk.

Juve an harh?
Season bul an ṭan chhiat vangin Juventus-in sawisel an hlawh a, manager Allegri-a'n an insiamṭhat ran tur thu sawi mah se an insiamrem hleithei meuh lo - chutih rualin Serie A lama result an neih ṭhat loh lai pawhi UCL-ah chuan Malmo 3-0 in an luhchhuah thei.

Allgeri naute hian league lamah pawh tun hnaiah a zawnin vawi hnih hnehna an chang ve ta, result ṭha a ni. Amaherawhchu, an hneh pahnih hi Spezia leh Sampdoria niin goal hnih an chhuah ve ve - tlarhnung ven thiam Juve tan chuan siamṭhat ngai a la tam.

Euro 2020 Italy an champion theih nana rinrawl Leonardo Bonucci chu club-ah pawh rinrawl a ni a, Dutch defender Matthijs de Ligt nen an inkawp ṭhin; zaninah chuan De Ligt aiah tawnhriat ngah zawk Giorgio Chiellini hmel kan hmu a nih pawhin a mak lo ang.

Midfielder Manuel Locatelli-a'n Sampdoria lakah goal a khung a, Euro star Federico Chiesa bakah Rodrigo Bentancur an la neih bawk avangin midfield chu an la ṭha tawk viau, goal khung turin Moise Kean a hriam tawk em tih chu fiah a ni bawk dawn.