Moeen Ali-a'n Test cricket a chawlhsan

England all-rounder Moeen Ali chuan nimin khan Test cricket a chawlh thu a puang a, ODI leh T20 erawh a la khel chhunzawm dawn.

Kum 34 mi Moeen hian kum 2014 khan England leh Sri Lanka inkhelh ṭumin Test match a khel ṭan a, Test match 64 khelin 2,914 runs a siam bakah 195 wicket a la bawk.

Moeen hi England-in World Cup 2019 an champion khan a tel a, kumina neih tur T20 World Cup preliminary squad-ah telh a ni bawk. England international Moeen chuan, "Test cricket hi nuam ka ti a, amaherawhchu pressure nasa tak avang hian ka duh khawp chu ka khel tawhin ka hria. Ka khelh tawh chinah ka lungawi e," tiin Test match a chawlhsa thu a puang.

England Test captain Joe Root chuan, "Moeen-a thutlukna hi England tan chuan channa lian tak a ni a, a kal zelna turah duhsakna ka hlan. Amah hi pa entawn tlak a ni a, thil ṭha tam tak a tih avangin midang tana zir tur a hnutchhiah tam hle," tiin Moeen a thlah a ni.