Barcelona hlim chhung a rei dawn em?

Tun hnaia hlim lai nei tlem ve tak Barcelona chuan an league match hnuhnung berah 3-0 in Levante an sawp a, Lionel Messi hmun ruak luah tura an beisei Ansu Fati-a'n hliam aṭanga a lo kir hnua a match hmasa berah hian goal a khung nghal bawk avangin an hlim hle.

Mahse, hlimna boruakah Barca an inhamtang rei hman lo a, Champions League-in a lo hmuak lehnghal - zanin dar 12:30 hian group stage match khel turin Benfica an lenchilh dawn a, Barcelona tan hna a awlsam lo ang.

Catalan club hian an match hmasa berah mikhual Bayern Munich chu 3-0 in an ngam lo tawh a, scoreline piahlama an khelh danin fans a tih lungawi loh avangin coach Ronald Koeman dinhmun pawh a derthawng hman hle - zaninah chak an mamawh.

Bundesliga match ruka tlawm la nei lo Bayern Munich pawh zanin dar 12:30-ah vek an inlan dawn a, German club-in an mikhual tur hi Dynamo Kiev an nih avangin hnehna chang ngei tura ngaih an ni.

Thim ata êng
Bayern laka an tlawm hnu khan Barca-in league-ah Granada chu 1-1 in an inhnehtawkpui a, coach Koeman-a'n, "Kan squad hi en ula, eng nge ti tura min beisei? Tiki-taka khelh maw?" tiin amah kawmtute a zawt let a, a squad-ah rinna a nghat tawk lo tih a lang.

Dutch coach Koeman hian nipui transfer-a a chân tak Lionel Messi a ngai tih pholang zuiin, "Messi khan buaina tam tak a hliah khuh mai mai a ni," a ti a, Argentine forward vanga Barca chu club ṭha anga lang ve reng an nih thu a sawi.

Barca an insiamṭha lo - khualmualah club tenau Cadiz chu goal khung loin an inhnehtawkpui zui a, club president Joan Laporta leh Koeman inkar boruak a ṭhat loh thu a put zui a, Barca-ah ni a chhuak thei lo.

Mahse, Barca fan-te an indawmkun lai takin beiseina ni a êng a, an league match hnuhnung berah Levante 3-0 in an sawp a, Messi number 10 kalsan tak hatu Fati chuan, "Barcelona kan ni a, inelna kan telna apiangah champion kan duh," a ti zui zat a, Barca fans an nui ve leh ta.

Beiseina
Barca-in Benfica an lenchilh hmain chanchin lawmawm an nei zui a, Bayern Munich laka inhliam defender Jordi Alba leh midfielder duhawm Pedri te chu an hliam a dam tawh - Koeman-a'n a duh phawt chuan Benfica lakah a chhawr thei dawn.

Hetihrual hian Portuguese club nena an inkhel tur hi Barca-in an ngaih awlsam chuan chetsual theihna tur a ni. League match sarih an khelh tawhah Benfica hi an la chak vek a, point 21 hmuin hma an hruai mek.

Portuguese club tlarhnung en chuan tawnhriat nei ṭha Nicolas Otamendi leh Jan Vertonghen te an awm a, Barca-in tlarhmaah Messi, Antoine Griezmann leh Luis Suarez ni loa Memphis Depay leh Luuk de Jong te an neih tak bawk avangin Benfica tlarhnung hi zuam chi an ni lo ang.

Benfica tan tlarhmaah inelna hrang hranga match kua khelha goal li leh assist pali neitu Roman Yaremchuk a awm a, kum 22 mi Darwin Nunez hi match rukah goal li a khung avangin ngaihthah a thiang lo bawk ang.

Bayern inlan zan
Champions League nomawi chawi turin inrinsiak dawn ila, tam tak chuan ngaihtuahna seng buai miah loin Bayern Munich lamah an dah ang - a awm lo hran lo. Match hmasa berah nuamsa takin Barca an hneh a, Bundesliga lamah hnaihtu eih an awm lo bawk.

German club hian league match ruk lek an khelhah goal 23 ngawt an khung tawh a, an lamah goal nga chiah a la lut zui - tlarhmaah tun season inelna hrang hrang match riata goal 11 khung tawh Robert Lewandowski a awm a, zanin dar 12:30-a an mikhual tur Kiev defender-ten ven an chak lo ang.

Dynamo tan erawh centre back Denys Popov chu hliam vangin a inlan theih a rinawm loh a, kum 19 mi Ilya Zabarnyi-a'n Lewy dah ṭhat hna a thawh a ṭul dawn avangin rinna chak fal lo tan chuan Ukrainian club hi chak tur zawka dah an harsa hle.

Hei chauh a ni lo - tlarhma player Eric Ramirez, Artem Besedin, Vladyslav Kulach leh Ibrahim Kargbo te chu Kiev tan an inlan thei dawn lo vek a, ṭhat dan ber pawha hmachhawn châkawm lo Bayern hi an ṭhat dan ber ni phak lo chungin an lenchilh dawn.